Úlkenderdiń otaý qurǵan, tanysqan tarıhyn surasań, kóbine toı-tomalaqta, jumys barysynda, týys-týǵandar arqyly tabysqan bolyp shyǵady. Rasymen, burynǵy kitaptyń keıipkerleri de poıyzda, kitaphanada nemese kóshede kezdeısoq tanysatyn.
Búgingi tańda mahabbattyń joly da, mekeni de ózgerdi. Buryn hat arqyly syrlasyp, kezdesý saǵatyn taǵatsyzdana kútken juptar endi smartfonnyń ekranynan bastalatyn sezimge senedi. Qazir júrekter áleýmettik jelilerde soǵady, kózqarastar laık arqyly toǵysady, al alǵashqy «sálem» degen habarlama taǵdyrdyń jańa paraǵyn ashýy ábden múmkin, sóıtip vırtýaldy baılanystyń shynaıy ómirde jalǵasyp, máńgilik mahabbattyń áýenine aınalǵan kezi kóbeıip keledi.
Jelide tabysqan júrekterdiń tarıhy — qazirgi zamannyń zamanaýı ertegisi. Olar qashyqtyq pen ýaqytqa qaramaı, birin-biri tyńdaı bilý men senimniń arqasynda tabysady. Biraq ekran artynda da sezimniń shynaıylyq atty eń basty ólshemi ózgermeýi tıis.
Tanysý qosymshalary men áleýmettik jeliler tek qarym-qatynas quraly ǵana emes, mahabbattyń da mekenine aınaldy. Talaı jup dál osy vırtýaldy keńistikte tabysyp, shynaıy ómirde otbasyn quryp jatyr. Degenmen, kópshilikti aldymen oılandyratyny — mundaı tanystyqtyń ómirsheńdigi.
«Internet – adamǵa óz oıyn erkin jetkizýge múmkindik beredi, biraq sol erkindik keıde beıneni ıdealızasıalaýǵa da ákeledi. Iaǵnı adam shyn mánindegi tulǵany emes, ekrannyń artyndaǵy ıdeal beıneni súıip qalýy múmkin. Alaıda onlaın tanystyqtyń bári birdeı ótkinshi emes. Eger jup bir-birin tek jazba arqyly emes, naqty ómirde de tanyp-bilýge umtylsa, sezim de, senim de bekı túsedi», – deıdi psıholog Nurlygúl Aıǵan.
Bizdiń búgingi keıipkerlerimiz — Baǵlan men Janar da áleýmettik jeliden bastalǵan tanystyǵy mahabbatqa ulasyp, shańyraq kótergen jarasymdy jup.
«Búgingi zamanda mahabbat pen taǵdyrdyń toǵysý joldary san alýan. Bireýler ómirlik jaryn ýnıversıtet qabyrǵasynan tapsa, endi biri qyzmet barysynda tanysady. Al keıbireýler úshin baqytqa bastar jol áleýmettik jeliden bastaý alady. Solardyń biri – bizdiń hıkaıamyz», deıdi olar.
Alǵashqy tanystyqtyń áseri júrekten óshpeıdi ǵoı, ásirese boıjetken úshin taǵdyrsheshti tanystyqtyń mańyzy zor. Janar da segiz jylǵa sheginis jasap, tanysqan kúndi esine túsirdi:
«2017 jyly VKontakte jelisi arqyly bastalǵan qarapaıym hat almasý, ýaqyt óte júrek jylýyn oıatqan erekshe baılanysqa aınalady. Birneshe kún áńgimelesken soń, jigit meni kınoǵa shaqyrady. Sol kezde men jumystan kesh, túngi 22:00-de shyǵatynmyn. Biraq alǵashqy kezdesý nıeti jeńip, áriptesterimnen erterek suranyp, kezdesýge bardym. Kezdesýdiń mekeni – ADK saýda úıi, al kórsetilgen fılm – «Chelovek-paýk». Kınoda otyryp sóıleskisi kelgen jigitke men kúlip: «Kınoda sóılesken birtúrli ǵoı, shyqqan soń áńgimelesemiz», – dedim. Osy sáttegi yńǵaısyzdyqty áli kúnge deıin eske alyp, kúlip otyramyz. Sol keshten bastap ekeýmizdiń aramyz ajyramastaı bolyp, áńgime men kezdesýlerge, senim men saǵynyshqa toly mahabbat dastany bastaldy.
Baǵlan meni jumystan kesh shyqqanda árkez kútip alyp, úıime deıin shyǵaryp salatyn. Keıde qaltasynda kólikke jeter qarajaty bolmaı qalsa da, jaıaý kelip, jaıaý qaıtatyn. Sol bir qarapaıym, biraq ystyq kóńil men qamqorlyqtyń arqasynda mahabbatymyz nyǵaıa tústi. Sol jazda men magıstratýranyń sheteldik tájirıbesine baılanysty Evropaǵa kettim. Al jigit bolsa, qyzǵanyshyn jasyra almaı, kún saıyn ýaıymdap, «kelgen soń úılenemiz» degendi qaıta-qaıta aıtatyn. Ýáde etkenindeı, elge oralǵan soń kóp uzamaı meni alyp qashty».
Árıne, unatyp qalý, jaqsy kórý degen sezimniń ulysy, degenmen bar nárseniń tóreshisi – ýaqyt. Mahabbattyń da ýaqyttyń synynan ótpeı qalatyn kezi bolady. Al Baǵlan men Janar ýaqyttyń synyn da, tirshiliktiń túıtkilin de mahabbatqa jeńdirýge bolady degen pikirde.
«Sodan beri segiz jyl ótti. Búginde biz – baqytty jup, eki súıkimdi qyzdyń ata-anasymyz. Ótkenge kóz júgirtsek, kúlki men saǵynyshqa toly sátterdiń bári júregimizde erekshe estelik bolyp qalǵan. Sol bir alǵashqy kezdesý, yńǵaısyzdanǵanymyzdy jasyrǵan kúlkimiz ben keshki serýender – bári búgingi baqytqa aparar joldyń bastaýy eken. Keıde júrekterdi taǵdyr ǵana emes, áleýmettik jeli de tabystyrady. Biraq shynaıy sezimdi saqtap qalý – tek eki adamnyń nıeti men mahabbatyna baılanysty. Al bizdiń tarıhymyz sonyń aıqyn dáleli», deıdi mahabbat hıkaıasyn baıandaǵan jup.
Joǵaryda jazǵanymyzdaı, shynaıylyq pen ózara qurmetke negizdelse ınternet arqyly tabysqan juptardyń odaǵy da berik bolýy ábden múmkin, búgingi keıipkerler osy sózimizge dálel bola alady. Óıtkeni mahabbattyń kúshi kezdesken jerden emes, júrekten bastaý alady.