Almaty qalasy Bostandyq aýdanynyń polıseıleri velosıpedter men basqa da múlikti urlady degen kúdikpen Shyǵys Qazaqstan oblysynyń 32 jastaǵy turǵynyn ustady.
Qazirgi ýaqytta tártip saqshylary onyń 10 zańsyz áreketke qatysy baryn dáleldedi, dep habarlaıdy aqshamnews.kz.
Er adam negizinen turǵyn aýdandarda urlyq jasap júrgen: múlikti qaraýsyz qaldyrǵanyn paıdalanyp, kireberisterden, aýlalardan jáne kóshelerden urlyq jasaǵan. Ol urlanǵan velosıpedterdi satyp, túsken aqshany jeke qajettilikterine jumsaǵan. Quqyq buzýshynyń Almaty qalasynda turaqty turǵylyqty jeri joq. Buǵan deıin ol osyǵan uqsas qylmystar jasaǵany úshin birneshe ret qylmystyq jaýapkershilikke tartylǵan.
— Qala turǵyndaryna qyraǵylyq tanytyp, velosıpedter men basqa da múlikti qorǵalmaǵan jerlerde qaldyrmaý kerektigin eskertemiz. Bul urlyq qurbany bolý qaýpin aıtarlyqtaı tómendetedi. Ustalǵan adamǵa qatysty sotqa deıingi tergeý júrip jatyr. Biz onyń basqa epızodtarǵa qatysy bar-joǵyn tekserýdi jalǵastyramyz, - dedi Bostandyq aýdandyq PB-ǵa qarasty polısıa bóliminiń bastyǵy Muhamedáli Seısenuly.
Polısıa qyzmetkerleri dál osyndaı jolmen urlyq jasaǵandardan zardap shekkenderdi Bostandyq aýdandyq PB-ǵa habarlasýlaryn suraıdy.