"Qazaqstan - zorlyq-zombylyqsyz otbasy" respýblıkalyq naýqany aıasynda Almaty qalasynyń Almaly aýdanynda áıelder isteri jáne otbasylyq-demografıalyq saıasat jónindegi aýdandyq komısıanyń otyrysy ótti.
Jıyn turmystyq zorlyq-zombylyqtyń aldyn alý, vedomstvoaralyq ózara is-qımyl jáne jábirlenýshilerge áleýmettik kómek kórsetý máselelerine arnaldy, dep habarlaıdy aqshamnews.kz. Polisia.kz-ke silteme jasap.
Otyrysqa polısıa, áleýmettik qyzmetter, bilim jáne densaýlyq saqtaý salalarynyń ókilderi, tájirıbeli psıhologtar men daǵdarys ortalyqtarynyń mamandary qatysty. Kezdesý barysynda turmystyq zorlyq-zombylyq qurbandaryna kómek kórsetýdiń tıimdi tetikterin ázirleý jáne tıisti qurylymdardyń úılesimdi áreketterin qamtamasyz etý máselelerine erekshe nazar aýdaryldy. Kún tártibinde — zorlyq-zombylyqtyń aldyn alý baǵdarlamalaryn júzege asyrý, úkimettik emes uıymdardyń naqty kómek kórsetý tájirıbeleri, sondaı-aq halyq arasynda aqparattyq-aǵartý jumystaryn kúsheıtý qajettiligi qaraldy.
- Árbir turmystyq zorlyq-zombylyq jaǵdaıy jedel áreket etýdi talap etedi. Polısıa áleýmettik qyzmettermen, medısına qyzmetkerlerimen, psıhologtarmen tyǵyz baılanysta jumys isteıdi. Bizdiń mindetimiz — qıyn jaǵdaıǵa tap bolǵan adamdarǵa naqty qorǵaý men qoldaý kórsetý. Mundaı kezdesýler kómek kórsetý algorıtmin naqty ári jedel etýge múmkindik beredi, — dedi Almaly aýdandyq polısıa basqarmasynyń bastyǵy Mahsat Pshan.
Jıyn qorytyndysy boıynsha mundaı vedomstvoaralyq kezdesýlerdi turaqty ótkizý, quqyqtyq túsindirý jumystaryn keńeıtý, sondaı-aq halyqtyń osal toptarymen jumys isteıtin mamandar úshin oqytý semınarlaryn uıymdastyrý týraly sheshim qabyldandy.