Áskerı qyzmetshiler 97 jastaǵy soǵys ardagerin týǵan kúnimen quttyqtady.
Qalalyq qorǵanys isteri jónindegi departamenti, Jetisý aýdandyq basqarmasynyń ókilderi jáne Desanttyq-shabýyldaý áskerleri 68602 áskerı bóliminiń áskerı qyzmetshileri maıdangerge aqjarma tilekterin arnady. Ardagerler keńesiniń ókilderi men áskerı qyzmetshilerdiń otbasy múshelerimen jumysty uıymdastyrý jónindegi qyzmet basshysy Aqmaral Daıyrbekova ardagerge zor densaýlyq jáne uzaq ǵumyr tiledi, dep habarlaıdy aqshamnews.kz Qorǵanys mınıstrligine silteme jasap.
Ilá Kýdın 1927 jyly Almaty oblysynyń Kerbulaq aýdanynda dúnıege kelgen. Maıdanǵa 1944 jyldyń sońynda Taldyqorǵan oblysynan shaqyrylǵan ol artılerıada qyzmet etti. Gıtlerlik Germanıa tize búkkennen keıin ony japondarǵa qarsy qımyldarǵa qatysý úshin Qıyr Shyǵysqa jiberedi. Ilá Grıgorevıch týǵan jerge jeti jyldan keıin ǵana oraldy.
Zeınetkerlikke shyqqanǵa deıin ardager mehanızator bolyp jumys istedi. Eńbegi úshin II dárejeli "Otan soǵysy" ordenimen jáne «1941-1945 jyldardaǵy Uly Otan soǵysyndaǵy eren eńbegi úshin» medalimen marapattalǵan. Ilá Grıgorevıchtiń áýletinde atasyn maqtan tutatyn segiz nemeresi jáne kóptegen shóbereleri bar.
Maıdanger quttyqtaýlar men syılyqtardy qýana qabyldap, soǵys jyldaryndaǵy estelikterin ortaǵa saldy. Ol jasóspirim kezinde týystaryn maıdanǵa qalaı shyǵaryp salǵanyn, joldastaryn joǵaltqanyn, biraq úmitin úzbegeni jaıly aıtty.
Óz kezeginde Ilá Grıgorevıch beıbitshilik úshin jan qıǵan jandardy jadynda saqtap, izet kórsetip júrgen áskerı qyzmetshilerge alǵys bildirdi.