Taýdaǵy «Jas sarbaz» lagerinde áskerı-patrıottyq klýbtardyń 75 tárbıelenýshisi taý týrızmi men álpınızm daǵdylaryn ıgerý maqsatymen oqýdan ótti.
«Jas sarbaz» lageri Almaty qalasynyń qorǵanys isteri jónindegi jáne Almaty oblysynyń Shekara qyzmeti departamentteriniń bastamasymen qurylǵan, dep habarlaıdy aqshamnews.kz Qorǵanys mınıstrligine silteme jasap.
Balalar Úlken Almaty (3 680 metr), Týrıs (3 890 metr) jáne Sátpaev shyńdaryna (burynǵy Keńes shyńy) (4 317 metr) kóterilip, elimizdiń kók týyn jelbiretti. Sonymen birge olar memlekettik shekaranyń perımetri boıynsha júrip ótip, Úlken Almaty kóli shatqaly men Prohodnoe shatqalyna joryq jasady. Osylaısha, İle-Alataýy ulttyq parkiniń geografıasymen tanysqan balalar qoryqtyń sulýlyǵyna tánti boldy.
– Lagerlik jıynǵa qatysýshylar Fesenkov atyndaǵy observatorıaǵa baryp, ǵaryshtyq baılanys torabynyń jumysymen de tanysty. Sonymen birge balalar «Alma-Arasan» shekara zastavasyna ekskýrsıa jasap, Shekara qyzmeti akademıasynyń shatyrly lagerinde boldy. Kýrsanttar kishkentaı qonaqtarǵa konsert uıymdastyryp, merekelik dastarhan jaıdy, – dedi jasarbazshylardyń jetekshisi Baqytjan Perimbetov.
Trenıńter men basqa da is-sharalardy ótkizýge Almaty qalasynyń qorǵanys isteri jónindegi departamenti men «Jıvaıa Vselennaıa» jekemenshik mektebi kómektesti. Al QR UQK Almaty oblysy boıynsha Shekara qyzmeti departamenti, «Jas sarbaz» áskerı-patrıottyq klýby, № 95 jalpy bilim beretin mektebi jıynnyń negizgi uıymdastyrýshylary boldy. Odan bólek Astana, Qaraǵandy, Taraz qalalarynan da balalar men ata-analar komıtetiniń ókilderi keldi.
Aldaǵy ýaqytta lager taǵy 100-den astam balany qabyldap, 15 tamyzda maýsymdy aıaqtaýdy josparlap otyr.