Kúdikti buryn da osyǵan uqsas qylmystary úshin birneshe ret sotty bolǵan.
Medeý aýdanynyń polısıa qyzmetkerleri saýda ortalyǵynda saýda ortalyǵynyń satýshylaryn tonap júrgen 52 jastaǵy er adamdy ustady, dep habarlaıdy Almaty-akshamy.kz Polisia.kz-ke silteme jasap.
«Dálirek aıtsaq, kúdikti iri oıyn-saýyq ortalyqtarynda ornalasqan dúkenderdi tańdaǵan. Satýshylary kelýshilerge qyzmet kórsetýmen qoldary bosamaı jatqan býtıkterge maqsatty túrde kirip júrgen. Onyń áreketin eshkim baqylap otyrmaǵanyna senimdi bolǵan qaskóı satýshylardyń uıaly telefondaryn nemese basqa da qundy zattaryn urlap otyrǵan. Tergeý áreketteri barysynda atalǵan adamnyń eki urlyq epızodyn jasaýǵa qatysy bar ekendigi anyqtaldy. Kúdikti buryn da osyǵan uqsas qylmystary úshin birneshe ret sotty bolǵan», – dedi Medeý aýdandyq polısıa basqarmasynyń bastyǵy Dáýren Ótebaev.
Qazirgi ýaqytta Sh. esimdi azamattyń Almaty qalasynda buryn jasalǵan osyǵan uqsas qylmystarǵa qatysy bar-joǵy anyqtalýda.
«Osy adamnyń qylmystyq áreketinen zardap shekken azamattardy myna telefon nómirleri arqyly habarlasýlaryńyzdy suraımyz: 254-48-02; 254-48-10; 8-702-476-6660», — dedi Ótebaev.