Almaty qalasynda qazaqtyń áıgili opera ánshisi, ustaz, Sosıalısik Eńbek Eri Bıbigúl Tólegenovanyń úıiniń aýlasynda áskerı orkestr áýen tókti.
Almaty qalasy Bostandyq aýdany qorǵanys isteri jónindegi basqarmasynyń jáne armıa generaly Saǵadat Nurmaǵambetov atyndaǵy Qurlyq áskerleri áskerı ınstıtýtynyń áskerı qyzmetshileri áıgili ánshini Táýelsizdik kúnimen jáne 96 jasqa tolǵan týǵan kúnimen quttyqtady. Olar óner ıesine gúl shoqtary men quttyqtaý hatyn tabystap, kópjyldyq shyǵarmashylyq eńbegi úshin alǵystaryn bildirdi.
Týǵan kúni elimizdiń Táýelsizdik kúnimen tuspa-tus kelgen Bıbigúl Ahmetqyzy úıiniń terezesinen konsertti jyly júzben tamashalady. Áskerı orkestrdiń áýenin tek ánshiniń ózi men jaqyndary ǵana emes, kópqabatty úıdiń turǵyndary da erekshe yqylaspen qabyldady. Tanymal óner ıesi áskerı qyzmetshilerdi árdaıym erekshe qýanyshpen, ystyq yqylaspen qarsy alady.
Kóńil-kúıi kóterińki bolǵan Bıbigúl Ahmetqyzy áskerı qyzmetshiler men barsha qazaqstandyqtardy Táýelsizdik kúnimen quttyqtap.
"Áskerı kıimdegi jandarǵa degen qurmetim erekshe. Qyzmetterińiz úshin jáne osyndaı áserli syılyq úshin alǵys aıtamyn. Elimizge beıbitshilik, árbir qazaqstandyqqa densaýlyq, tynyshtyq pen erteńgi kúnge degen senim tileımin", — dedi.