Almatynyń Bostandyq aýdanynda turǵyndardyń ótinishimen rettelmeıtin jol qıylystaryna 8 baǵdarsham ornatyldy
Bostandyq aýdanynyń turǵyndarymen kezdesý barysynda Almaty ákimi Erbolat Dosaev aýdannyń jol ınfraqurylymyn jańǵyrtý jáne jolaýshylar tasymaly sapasyn arttyrý jumystary týraly baıandady, dep habarlaıdy aqshamnews.kz
Qala basshysy jyl basynan beri 14 kóshede 12,5 km joldyń ortasha jóndeýden ótkenin, qazan aıynyń sońyna deıin taǵy 19 kóshede 17,5 km joldyń jóndeýden ótetinin habarlady. Aǵymdaǵy jóndeý aıasynda 69 kóshede 22 myń sharshy metr jol jóndeldi, qarasha aıynyń sońyna deıin taǵy 8 myń sharshy metr jol jóndeledi dep josparlanǵan.
«4 kóshede 1,7 km trotýarlar salý jumystary júrgizildi, aldaǵy aılarda taǵy 6 magıstraldyq kóshede 1,8 km trotýar salý josparlanyp otyr. Aýdan turǵyndarynyń ótinishimen rettelmegen jol qıylystaryna 8 baǵdarsham ornatyldy», – dedi Erbolat Dosaev.
Qoǵamdyq kólik qyzmetiniń sapasyn arttyrý týraly aıta kele, Almaty ákimi bıyl 10 baǵyt boıynsha avtobýstar jańartylyp, kólik sany 157-den 180 avtobýsqa deıin artqanyn habarlady.
Sondaı-aq, Bostandyq aýdanyndaǵy 7 mekteptiń 760 oqýshysy «Mektep avtobýsy» jobasymen qamtylǵan, al jańa oqý jylynyń basynan beri mektep avtobýstarynyń sany 17-ge deıin artty.
Aıta ketý kerek, jalpy Almatyda bıylǵy jyly 250 km bolatyn 274 kóshe ortasha jóndeýden ótedi. Osylaısha, jaqsy jáne qanaǵattanarlyq jaǵdaıda turǵan joldardyń úlesin 92%-ǵa jetkizý josparlanyp otyr. Sonymen qatar, jergilikti búdjet esebinen gazben júretin 600avtobýs, 100 elektrobýs jáne 112 troleıbýs satyp alynady.