Respýblıka kóleminde ótip jatqan «Taza Qazaqstan» ekologıalyq aksıasymen birge qalamyzdyń «Almaty – bizdiń ortaq úıimiz» atty naýqany qatar ótýde. Búgin, 20 sáýir kúni Alataý aýdanynda Keńes Odaǵynyń Batyry, Halyq Qaharmany, armıa generaly Saǵadat Nurbamǵambetovtiń 100 jyldyq mereı toıyna oraı 300 túp alma aǵashynyń kósheti otyrǵyzyldy.
Qala irgesindegi aýqymdy eko-aksıaǵa qala basshylyǵy men Máslıhat depýtattary, «Generaldar keńesi» men «Ofıserler keńesi» RQB ókilderi, memleket jáne qoǵam qaıratkerleri, belsendileri, sondaı-aq, BAQ ókilderi men eriktiler qatysty.
Almaty qalasy Máslıhatynyń tóraǵasy Meıirjan Otynshıev qalamyzda respýblıkalyq jáne qalalyq eko-aksıaǵa aıasynda kóptegen ıgi bastamalar qolǵa alynǵanyn jetkizdi.
«Ózderińiz bilesizder, Prezıdenttiń tapsyrmasymen sý tasqyny bolmaǵan óńirlerde “Taza Qazaqstan” ekologıalyq aksıasy ótip jatyr. Myna otyrǵyzylyp jatqan 300 túp alma aǵashy Halyq Qaharmany, armıa generaly Saǵadat Nurmaǵambetov syndy batyr atamyzdyń 100 jyldyń mereıtoıyna arnalyp otyr. Batys jáne soltústik óńirler sý tasqynymen kúresip jatyr, osy tusta ózge aımaqtarda osyndaı ekologıalyq aksıalardyń ótýi ekologıany, qorshaǵan ortany qorǵaý tanymyn qalyptastyrýǵa oń róli bolmaq», – Meıirjan Batyrbekuly.
Halqynyń súıikti perzenti ári táýelsiz eldiń tuńǵysh Qorǵanys mınıstri S.Nurmaǵambetovtiń ǵasyrlyq mereıtoıyna arnalǵan eko-naýqanǵa zeınettegi general-polkovnık Sát Toqpaqbaev ta kelip, óz qolymen kóshet otyrǵyzdy.
«Saǵadat Qojahmetuly syndy atalaryńdy bilesińder, elimizdiń áskerı-qaýipsizdik salasnyń aıaǵynan tik turýyna zor úles qosty. Mine 100 jyldyń mereıtoıy qarsańynda súıikti qalamyz – Almatyda osyndaı aýqymdy is-shara ótip jatyr. Bul negizi Almaty men urpaqtyń keleshegine jasalyp jatqan jumys. Erteńgi urpaq bul jerdi qazirgiden de ásem ortaǵa aınaldyrady», – degen úmitin jetkizdi Sát Besimbaıuly.
«Taza Qazastan» men «Almaty – bizdiń ortaq úıimiz» aksıalary aıasynda, ári qazaq batyrynyń mereıtoıyna arnalǵan ıgi sharaǵa bastamashy taraptardyń biri respýblıkalyq «Generaldar keńesi» boldy. Atalǵan keńestiń tóraǵasy general-maıor Mahmut Telegýsov kezekti is-sharanyń máni zor ekenin jetkizdi.
«Qazaqstan qarýly kúshteriniń qurylýynda aıryqsha úles qosqan Saǵadat Qojahmetulynyń 100 jyldyq mereıtoıy mundaı naqty is-sharaǵa baǵyttalǵany aıryqsha mańyzdy. Kórip otyrsyzdar, munda otstavkadaǵy, zeınettegi áskerıler, ardagerler jańa býynmen birge qalamyzdy kórkeıtýge, elimizdiń ekologıasyn jaqsartýǵa atsalysyp jatyr», – deıdi general-maıor Mahmut Ótegenuly.
Alataý aýdanyndaǵy ıgi istiń basyna ǵylym men mádenıettiń birqatar ókilderi de keldi. Solardyń qatarynda Roza Káripjanova almatylyqtardy osyndaı ıgi sharaǵa qatysýǵa shaqyrdy.
«Almaty – bárimizdiń súıikti qalamyz. Bolashaq urpaqqa ony janǵa jaıly, tamasha etip jetkizý bárimizdiń mindetimiz. El jastary, barlyq azamaty óz elimizdiń tabıǵatyn janymyzdaı qorǵap, qarashyǵymyzdaı aıalaýǵa tıispiz. Men osyndaı jasyl tabıǵat úshin jasalyp jatqan sharalarǵa barlyq almatylyqtardy qatysýǵa shaqyramyn», – dedi Roza Káripjanovna.
Bastamashy tarap jetekshileriniń biri retinde general-leıtenant Beksultan Sársekov eko-sharalar elimiz ben súıikti qalamyz Almatyǵa degen súıspenshiligimizdiń belgisi ekenin aıtady.
Ol jýrnalıserge: «Saǵadat Nurmaǵambetov syndy batyr atamyzǵa arnap óz qolymmen aǵash egeıin dep keldim. Sharanyń aýqymdy ótip jatqanyn kórip qabaǵat qýanyp turmyn. Almatymyz qashanda jasyl ári taza qala bolýy kerek. Almaty – meniń eń súıikti qalam. Osynda ósip-erjettim. Sondyqtan búgingi shara men úshin óte mańyzdy. Ardagerlerden tartyp ózge de áskerı azamattar, Shekara akademıasynyń kýrsanttary, jastar uıymdary da qatysyp jatyr. Bul azamattardyń súıikti qalamyz ben elimizge degen súıspenshiligin bildiredi», –degen pikirimen bólisti.
Eko-sharaǵa kelip óz qolymen kóshet otyrǵyzǵan otstavkadaǵy polkovnık Shyńǵys Toqborauly da batyrdy ulyqtaý men eko-sharalardyń ushtasýyn quptaıdy.
Óz óziniń: «Saǵadat Qojahmetuly – dańyqty adam. Búgin mine osyndaı naqty is-shara arqyly bir jaǵynan batyr tulǵany eske alyp, endi bir jaǵynan bolashaqqa, keler urpaqqa paıdaly is atqaryp jatyrmyz dep oılaımyn. Munda qazir zeınettegi ofıserler men jańa kýrsanttar da kelip otyr. Osynyń ózinde de úlken sımvoldyq máni bar. Tabıǵat, urpaq sabaqtastyǵy osyndaı ıgi shara aıasynda toǵysyp jatyr», – degen pikirimen bólisti.
300 túp alma aǵashy otyrǵyzylǵan aýmaq Almatydaǵy Almaty JEO-2 aýmaǵyna jaqyn ornalasqan. Alataý aýdanynyń ákimi Azamat Qaldybekov osy aýmaqty jasyldandyrýda qalany kóriktendirýmen qatar jylý elektr ortalyǵynan bólinen laz gazdardyń taralýyn azaıtý maqsaty kózdelgenin aıtty.
«Aýdanymyz qaladaǵy eń jas ári qarqyndy damyp kele jatqan aýdan sanalady. Sońǵy 4 jylda aýdan kóleminde 350 myń túpten asa aǵash egildi. Sonymen birge, bul aǵashtardy sýarýǵa alǵash ret tamshylatyp sýar tehnologıasy engizildi. Qazir ótip jatqan respýblıkalyq jáne qalalyq eko-aksıalar aıasyndaǵy jumystar aldaǵy ýaqytta da jalǵasatyn bolady», – deıdi aýdan ákimi A.Qaldybekov.
Azamat Qaldybekovtyń aıtýynsha byltyr osy aýmaqqa Almaty qalasynyń halyqaralyq termınal kody sanalatyn «ALA» áripteri formasynda aǵashtar otyrǵyzylǵan. Qazir sonyń aýmaǵyn keńeıtip, qala mańyn jasyldandyrý jumystary júrgizilip jatyr.
Aıta keteıik, «Almaty – bizdiń ortaq úıimiz» naýqany 8 sáýir men 8 mamyr arasynda ótedi. Qorshaǵan ortany qoraǵaý tanymyn men qala mádenıetin jetildirý maqsatyndaǵy aýqmydy jobanyń qazir 15-21 sáýir aralyǵyndaǵy ekinshi kezeńi ótip jatyr. Al 11 sáýirden tartyp Prezıdent Qasym-Jomart Toqaevtyń bastamasymen respýblıkalyq «Taza Qazaqstan» ekologıalyq aksıasy ótýde. Atalǵan sharalar barsha azamattardy qorshaǵan ortany qorǵap, elimizdiń tabıǵatyn ortaq aıalaýǵa shaqyrady.
