26 shildede Almaty qalasyndaǵy sýmen qamtý máselesine qatysty baspasóz týry ótti.
Oǵan Almaty energetıka jáne sýmen jabdyqtaý basqarmasynyń basshysy Talǵat Malybaev, Medeý aýdanynyń ákimi Erkebulan Orazalın, Tótenshe jaǵdaılar departamenti bastyǵynyń mindetin atqarýshy Erlan Álibekov, sonymen qatar, «Almaty Sý» ókilderi qatysty, dep habarlaıdy Almaty-akshamy.kz.
Baspasóz týry barysynda jýrnalıser Kishi Almaty ózeninen aǵatyn sýdy kózben kórip, «Medeý» súzgi stansıasyndaǵy sý daıyndaý úderisimen, «Balqash» sýmen jabdyqtaý nysanyn rekonstrýksıalaý jáne sýmen jabdyqtaý jelisin salý jumystarynyń barysymen tanysty. Mamandar taýl ózenderde sýdyń laılaný deńgeıiniń joǵarylaý sebebin, osyǵan baılanysty Almaty turǵyndary úshin aýyz sýdyń qysymy tómendegenin nemese sý berýdiń shektelgenin aıtyp berdi.
Erlan Álibekovtyń aıtýynsha, sońǵy 13 kúnde temperatýranyń kóterilýine baılanysty Almaty qalasynyń taýly jerlerinde muzdyqtardyń erýi joǵarylaıdy.
«Biz qazir aerovızýaldy sholý jasadyq, ol Kishi Almaty ózeninde sý deńgeıiniń joǵarylaǵanyn kórsetti. Jalpy, dál osyndaı jaǵdaı basqa ózenderdiń arnalarynda da baıqalady. Sý deńgeıiniń joǵarylaýy ózen jaǵalaýyn shaıady. Bul ózendegi bastapqy sýdyń laılanýynyń joǵarylaýyna ákeledi. Sonymen qatar, sýdyń laılanýy qarqyndy erip jatqan muzdyqtarǵa baılanysty», - dedi ol. Osylaısha, sýmen jabdyqtaýdyń shektelýi tehnogendik másele emes, tek tabıǵı qubylystardan týyndaıdy.
Onyń aıtýynsha, shildede baıqalǵan mundaı ystyq aýa-raıy sońǵy ret 8 jyl buryn bolǵan.
«Ótken jyldary shilde men tamyz aılarynda salqyn boldy, osyǵan baılanysty buryn mundaı túıtkil týyndaǵan joq. Sınoptıkter jumadan bastap aptanyń sońyna qaraı aýa temperatýrasy +25-28°C deıin tómendeıdi dep boljaıdy. Bul tamyzdyń birinshi onkúndiginde de saqtalady. Osy jaǵdaıda laılaný konsentrasıasy kemıdi, óıtkeni muzdyqtardyń erýi azaıady», - dep E.Álibekov taýly jerlerde nóser jańbyr jaýǵan jaǵdaıda laılaný deńgeıiniń ózgerýi múmkin ekenin aıtty.
«Biz jaǵdaıdy baqylaýda ustaımyz. Taýly jerlerde alty kólde aldyn alý jumystary júrgizilýde, sonyń arqasynda sý deńgeıi tómendedi. Kún saıyn barlyq morenalyq kólge monıtorıń júrgizemiz, baqylaý jasaımyz», - dedi Erlan Álibekov.
Talǵat Malybaev sý berý máselesi birneshe aýdanǵa, sonyń ishinde Naýryzbaı aýdanyna da áser etkenin atap ótti. Aıtýynsha, búgingi tańda megapolıs jer asty jáne jer ústi sýmen jabdyqtaýdyń alty negizgi kózimen qamtamasyz etilgen.
«Jer ústi kózderiniń negizgileri Kishi Almaty, Úlken Almaty, Aqsaı jáne Qarǵaly ózenderi bolyp tabylady. «Medeý» sý qabyldaǵyshy Medeý aýdanynyń batys bóligin qamtamasyz etedi. Biz sýdy súzgi stansıasyna jetkize almaımyz, sebebi ol bitelip qalyp, qala úshin naqty tehnogendik qaýip paıda bolady. Laılaný azaıyp, sý tazarǵan kezde «Medeý» sý qabyldaǵyshy tolady», - dedi Talǵat Malybaev.
Ol Energetıka jáne sýmen jabdyqtaý basqarmasy bas jospar aıasynda Almatyǵa qosylǵan aýmaqtardy sýmen qamtamasyz etý boıynsha joba ázirlenip jatqanyn habarlady. Eger bolashaqta mundaı jaǵdaı qaıtalansa, onda olardy jer asty kózderiniń kómegimen sheshýge bolady.
«Qazir máseleni sheshý úshin biz kúnine eki ret emes, ár saǵat saıyn táýlik boıy úzdiksiz sýdy taldaımyz. Eger taldaý laılanýdyń tómendeýin kórsetse, biz sýdy ýaqytsha qosamyz. Búgin Kishi Almaty ózeninen alynǵan sýǵa taldaý jasadyq. Nátıjeler laılylyq deńgeıi 340 mg/dm3 bolǵanyn kórsetti, biraq súzgi stansıasy arqyly qajetti kólemde turaqty sý berý úshin laılylyq deńgeıi 30-40 mg/dm3 deıin tómendeýi qajet», - dedi «Almaty sý» sý kózi departamentiniń dırektory Oleg Iýgaı.
Baspasóz týry barysynda BAQ ókilderine Medeý aýdanyndaǵy jańa sý qoımasynyń qurylys alańy kórsetildi.
Medeý aýdanynyń ákimi Erkebulan Orazalın byltyr kúzden bastap Medeý aýdanynda sońǵy 30 jylda aýqymdy qurylys salynǵandyqtan sý qysymynyń tómendegenin atap ótti. Sondyqtan, onyń aıtýynsha, atalǵan rezervýardyń qurylysy Almaty ákimi Erbolat Dosaevtyń tapsyrmasy boıynsha TJ jelisi boıynsha júzege asyrylýda. Jobanyń ákimshisi Medeý aýdany ákimdiginiń apparaty bolyp tabylady.
«Nysan óte mańyzdy, ony iske asyrý bıyl Medeý aýdanynyń ońtústik bóligindegi birqatar shaǵyn aýdandy turaqty sýmen qamtamasyz etýge múmkindik beredi. Jobada 4 uńǵymany burǵylaý, saǵatyna sýdyń jalpy debeti 200-220 tekshe metrge deıin jáne qazir salynyp jatqan eki úlken rezervýar qarastyrylǵan. Árqaısysynyń kólemi 3 myń tekshe metr. Jumys prınsıpi - uńǵymalar rezervýarlardy toltyrady, sol jerden sý Kamensk ústirtine, Býtakovkaǵa, Iýbıleınyı jáne Kólsaı sh / a-ǵa jetkilikti mólsherde jiberiledi. 20 myńǵa jýyq turǵyn turaqty sýmen qamtamasyz etiledi. İske asyrý merzimi – 2023 jyldyń jeltoqsanyna deıin. Barlyq jumys "Almaty Sý" kompanıasynyń talaby men kelisimi boıynsha júrgiziledi. Bul jobany odan ári komýnaldyq kásiporynnyń paıdalanýyna jáne kútip-ustaýǵa berýdi qamtamasyz etedi», - dedi Almaty qalasynyń Medeý aýdanynyń ákimi.
Ol sýmen jabdyqtaý shektelgen Medeý aýdanyndaǵy sý tasıtyn kólikterdiń sany artqanyn habarlady.
"Keshe biz 8 sý tasıtyn kólikti, búgin taǵy 6 kólikti jumyldyryp, erteń olardyń sanyn 18 birlikke deıin arttyramyz. Bul rette, bir adamǵa bir lıtr sý mólsheri shektelmeıdi, ıaǵnı turǵyndar óz qajettilikterine sáıkes sý alady", - dedi E.Orazalın.
Bıotýaletterge kelsek, búgingi tańda Medeý aýdanynyń ońtústik bóliginde 28 birlik ornatyldy. Ári olardyń sany turǵyndardyń suranysy boıynsha kóbeıedi.
Sýmen qamtý máselesine baılanysty ótinishter úshin jedel jeliler uıymdastyryldy. Ol myna nómirler boıynsha qabyldanady: + 7 775 594 90 94 (dárethanalar boıynsha), + 7 707 776 47 72 (sý tasıtyn kólikter boıynsha). Aýyz sýdy jetkizý máselesi boıynsha ótinimderdi «Almaty Sý» MKK dıspecherlik qyzmeti kelesi nómirler boıynsha qabyldaıdy: 274-66-66, +7 777 852 91 01.
Anyqtama:
«Almaty Sý» MKK derekteri boıynsha qazirgi ýaqytta Iýbıleınyı, Taý Samal (Kamensk ústirti), «VIP Alem» kotej qalashyǵy, «Evropolıs» TÚK, Kereı men Jánibek handar kóshesi, Ońdasynova, Ladýshkına, Ospanova, Qyz Jibek, Jánibekova, Naımanbaeva, Dostyq, Chaıkına kóshesindegi tutynýshylarǵa sý berý shekteldi.
Jelilerdegi sý qysymynyń tómendeýi Qajymuqan, Baıjanov, Lýganskıı, Dostyq dańǵyly, Nurmaǵambetov, Saharıev, «Kóktóbe», «Samal-1, 3», «Taýly Qyrat» shaǵyn aýdandaryndaǵy kóshelerde baıqalady.