Qýanysh Nurǵazın elimizdegi demokratıalyq reformalarǵa senedi
«Meniń 12 jyl ómirim jıenim úshin shetelde ótti». Óz erkimen elge kelip ustalǵan Ábilázovtyń sybaılasy ári naǵashy aǵasy Qýanysh Nurgazın Almaty.tv suhbat berdi dep habarlaıdy Almaty-akshamy.kz. Densaýlyǵynan ábden aıyrylǵan ol jylyna ózge elde birneshe ret aýrýhanaǵa da jatqanyn da aıtty.
73 jastaǵy Qýanysh Nurǵazın esimdi bul kisini kezinde Muhtar Ábilázov 2007 jyly BSC kompanıasynyń nomınaldy dırektory etip taǵaıyndaıdy. Bas prokýratýranyń málimetine sáıkes, Ábilázov jáne onyń sybaılastary osy kompanıany zańsyz nesıelendirý arqyly BTA bankten asa iri kólemde qarajat jymqyrǵan. Quzyrly organ ókilderi Nurǵazın sol kezde bul iske qatysy bola tura eshqaıda ketpeý týraly mindettemeni buzyp, qylmystyq jaýapkershilikten jaltarý úshin sottan jasyrynǵanyn aıtady. Nurǵazın osylaısha 2012 jyly Qazaqstannan Lıtvaǵa ketip, ózge elde 12 jyl boıy bosqyn mártebesimen júripti.
– 2007-2009 jyldar aralyǵynda BSC kompanıasynyń dırektory boldym. Biz BSC kompanıasy 152 mln teńge nesıe alǵanbyz. Maǵan nesıe alǵanda sybaılas boldyń dep aıyp taǵylyp otyr, – dedi kúdikti Qýanysh Nurǵazın.
– Men izdeýde júrgenimdi bilgen joqpyn. 2014 jyly aýrýhanadan shyǵyp kele jatqanymda polısıa ustady. Sol kezde túsindim. Maǵan «bosqyn» degen ataq berdi. Osy ýaqytqa deıin Lıtvada boldym, – dedi kúdikti Qýanysh Nurǵazın.
Ózge elde júrip, onyń densaýlyǵy kúrt nasharlaǵan. Birneshe kúrdeli ota jasaǵan. Sozylmaly aýrýǵa shaldyqqan. Muny suhbat barysynda ózi aıtty. Al sońǵy 5 jylda jıenimen baılanysy úzilgendikten qarjylaı qoldaý da bolmaǵan kórinedi. Aıta keteıik, ol Qazaqstanǵa kelý úshin Lıtvanyń saıası qamqorlyǵynan da bas tartqan eken.
– Meniń jıenim úshin 12 jyl shetelde ómirim ótti. Ol jerde esepte turdym. Jylyna eki ret aýrýhanaǵa jattym. Densaýlyǵyma baılanysty kóp ózgeris boldy. Júrekten eki ret ınfarkt aldym. Býyndarymdy aýystyrdy, eki ıyǵym jyǵylǵannan úzilip ketip, tiktirdim. Shetelde ótken 11 jyl ómirim sol balaǵa baılanysty boldy, – dedi kúdikti Qýanysh Nurǵazın.
Arada osynsha ýaqyt ótkennen keıin Nurǵazın Otanyna óz erkimen kelýdi uıǵarypty. Onyń elge qaıtýyna Qazaqstandaǵy demokratıalyq ózgerister sebep bolǵan. Endigi ómirin týǵan jerinde balalary men nemereleriniń qasynda ótkizýdi josparlap otyr. 2023 jyly 24 shildede ushaqpen Lıtvadan Stambýl arqyly Almaty halyqaralyq áýejaıyna kelip qonady. Ózi sekildi shetelde qashqyn atanǵandarǵa da aıtary bar.
– Eshqashan saıasatqa aralaspadym. Men oǵan «sen aralas, aralaspa» dep aıta almaımyn. Ol meni tyńdamaıdy. Meniń erkim ózimde. Jańa Qazaqstan dep jatyr ǵoı, demokratıalyq ózgerister bolady dep senemin. Sondyqtan elge, jurtqa qaıtýdy sheshtim. Men shetelde júrgen qashqyndarǵa sottyń ádil sheshimi bolatynyn aıtqym keledi. «Otan ottan da ystyq». Sondyqtan qaıtý kerek dep esepteımin, – dedi kúdikti Qýanysh Nurǵazın.