Almaty polısıasy «Boryshker» jedel-profılaktıkalyq is-sharasyn ótkizýde
Áleýmettik jeli qoldanýshylary jol saqshylarynyń erekshe kólikterin qyzý talqylap jatyr. Sebebi kóliktiń tóbesine «Sergek» kamerasy ornatylǵan, dep habarlaıdy Almaty-akshamy.kz QazAqparat saıtyna silteme jasap.
Almaty qalalyq polısıa departamentiniń málimetinshe, qalada aıyppul tólemeı júrgenderdi anyqtaıtyn «Boryshker» jedel-profılaktıkalyq is-sharasy ótip jatyr.
«Almaty polısıasy «Boryshker» jedel aldyn alý is-sharasyn júrgizýde. Jol qozǵalysy kóp jerlerde sharany ótkizýge jol-patrýldik polısıasynyń avtokólik ekıpajy qatysady. Ákimshilik aıyppuldar boıynsha bereshegi bar boryshkerlerdi avtomatty túrde esepteıtin «JQQ» AAJ jáne «Sergek» AÓK de qoldanylady»,- – dedi Almaty qalalyq PD ákimshilik polısıa basqarmasynyń bastyǵy Nurlan Amanbek.
Quqyq buzýshynyń kóligi mamandandyrylǵan aıyppul turaǵyna qoıylady.
«Josparlanǵan kezeńdik is-shara shekteýleri bar adamdar men kólik quraldaryn anyqtaýǵa, sondaı-aq ákimshilik quqyq buzýshylyq týraly is boıynsha mindettemelerdi erikti túrde, zańmen belgilengen merzimde oryndamaǵan adamdardy anyqtaýǵa baǵyttalǵan. Qozǵalyp kele jatqan kólik aǵynynyń arasynda júıe quqyq buzýshynyń kóligin anyqtaıtyn bolsa, ınspektor kólikti toqtatady jáne toqtaý sebebin túsindiredi. Sodan keıin quqyq buzýshynyń kóligi mamandandyrylǵan aıyppul turaǵyna qoıylady. Turý ornynda Qazaqstan Respýblıkasynyń Ákimshilik quqyq buzýshylyq týraly kodeksine sáıkes tárkileý hattamasy jasalady. Mundaı ákimshilik sharalar quqyq buzýshylardyń zańdy mindettemelerdi ýaqytynda oryndaýyna tıimdi áser etedi dep esepteımin», – dedi polısıa ókili.
Sondaı-aq, is-sharaǵa Óńirlik jeke sot oryndaýshylar palatasynyń sot oryndaýshylary men Almaty qalasy prokýratýrasynyń qyzmetkerleri qatysady.
Barlyq quqyqtar qorǵalǵan. inform.kz belsendi siltemeni paıdalanyńyz https://www.inform.kz/kz/almatyda-policiya-koligine-sergek-kamerasy-ornatyldy_a3839662