Soda óndirisi damıdy
Qazaqstanda kálsılengen soda óndiretin alǵashqy kásiporyn salynady, dep habarlaıdy Almaty-akshamy.kz Qazaqtv.com saıtyna silteme jasap.
Bul – shyny, hımıa, metalýrgıa, taý-ken óndirisi jáne toqyma ónerkásibi salalaryn damytýda asa qajet ónim. Quny 400 mln dollar bolatyn joba túrik ınvestorlarynyń qatysýymen júzege asyrylady. Ereksheligi: ónim óndirisi barysynda tek ekologıalyq taza jáne qaldyqsyz tehnologıalar qoldanylatyn bolady.
Zaýyt qurylysy bıylǵy jyldyń III toqsanynda bastalady dep kútilýde. Qurylys jumystary 3 jylǵa josparlanǵan. Bastapqy kezeńde zaýyttyń óndiristik qýaty jylyna 500 myń tonna ónimdi qurap, ony 1 mln tonnaǵa deıin jetkizý kózdelgen.
Bul bizdiń elimizge kálsılengen soda ımportynan qutylyp qana qoımaı, Qytaı, Túrkıa, AQSH jáne Reseı sıaqty jetekshi óndirýshilermen bir qatarda turýǵa múmkindik beredi.
Budan basqa ishki qajettilikterdi óteýmen qatar, bolashaqta Qazaqstan taýardy Qytaı men TMD elderine eksporttaı alady.