Festıváldiń túrli baǵdarlamalaryna elý fılm qatysqan.
Almatyda HVI Halyqaralyq «Eýrazıa» kınofestıvaliniń jabylý saltanaty ótti, dep habarlaıdy Almaty-akshamy.kz.
Ótken aptada «Eýrazıa» kórermenderi men qatysýshylary 25 eldiń kınokartınalaryn tamashalady. Barlyq kórsetilimder anshlagpen ótti. Festıváldiń túrli baǵdarlamalaryna elý fılm qatysqan, onyń úsheýi – álemdik premeralar («Arý Elena», «Boran» jáne «Aýyl» fılmderi).
Sondaı-aq «Meni Ivansyz jerlemeńder» fılminiń halyqaralyq premerasy ótti. Eki azıalyq premera boldy. Atap aıtqanda, «Mármárdaı sýyq» jáne «Qudaıdyń shaqyrýy» kartınalary. Sondaı-aq kórermender óz elderinen «Oskar» syılyǵyna usynylǵan tórt kartınany jáne «Azıa Oskarynyń» (Asia Pacific Screen Awards) ıegeri «Esimde» fılmin kórdi.
Festıvál aıasynda sheberlik sabaqtary, qazaqstandyq rejıserlerdiń jańa fılmderiniń tusaýkeserin qamtyǵan work-in-progress baǵdarlamalary ótti. On tórt baspasóz konferensıasy jáne «Qazaq kınosyn damytý vektorlary» atty dóńgelek ústel uıymdastyryldy. Festıvál qonaqtary taqyryptyq keshterge qatysty. Festıvál tarıhynda tuńǵysh ret «Eýrazıa» televızıalyq kúndelikteri birden elimizdiń eki telearnasynda kórsetildi.
Óz kezeginde festıváldiń qazylar alqasy kınokórsetilimderdi qorytyndylap, birneshe nomınasıalar boıynsha konkýrstyq baǵdarlamalardyń jeńimpazdaryn anyqtady.
Esterińizge sala ketsek, festıváldiń ashylý saltanatynda «Ortalyq Azıa kınematografynyń damýyna qosqan úlesi úshin» arnaıy júldesin ataqty ózbek rejıseri Alı Hamraev jeńip alǵan bolatyn. Ol osy festıválde halyqaralyq baıqaýdyń qazylar alqasyn basqardy. Óz kezeginde «Qazaq kınematografyna qosqan úlesi úshin» arnaıy syılyǵyn mádenıettanýshy jáne qoǵam qaıratkeri Murat Áýezov aldy.
Saltanatty shara jeńimpaz fılmniń kórsetilimimen aıaqtaldy.