Oǵan qatysýǵa 100-ge jýyq almatylyq kompanıa ótinim berdi.
Búgin Almatyda «Qazaqstannyń úzdik taýary» atty otandyq óndirýshilerdiń kórmesi bastaldy, dep habarlaıdy Almaty-akshamy.kz «Atameken» UKP baspasóz qyzmetine silteme jasap.
Óńirlik kórme-baıqaý úsh nomınasıa boıynsha ótedi: «Óndiristik maqsattaǵy úzdik taýarlar», «Halyqqa arnalǵan úzdik taýarlar», «Úzdik azyq-túlik taýarlary». Ár nomınasıada úsh jeńimpaz anyqtalady.
Sharaǵa Almaty qalasynyń ákimdigi, elshilikter men konsýldyqtar, memlekettik organdar, bilim berý uıymdary, qoǵamdyq uıymdardyń ókilderi qatysyp jatyr.
«Búgin biz Almaty bıznesi úshin aıtýly sharaǵa jınaldyq. Búgingi kórme «Qazaqstanda jasalǵan» óndiristiń, tutastaı ekonomıka damýynyń naqty kórsetkishi. Otandyq óndiris tóńireginde kóp syn aıtylady. Tipti jergilikti óndiris joq deıtinder bar. Meniń aıtarym, óndiris salasy jyldan jylǵa ósip, damyp keledi. Osy bastamalardy palata, memleket, qoǵam retinde birlesip, qoldaý kórsetip qana ilgerilete alamyz. Árkez, múmkindiginshe otandyq ónimdi tańdaıyq! Barlyq qatysýshyǵa sáttilik tileımin», – dep atap ótti ashylý saltanatynda Almaty qalasy kásipkerler palatasynyń dırektory Aıtýar Qoshmambetov.
Kórmege qatysyp jatqan almatylyq óndirýshiler saýda, qyzmet kórsetý, mashına jasaý, metalýrgıa, tamaq ónerkásibi, jeńil ónerkásip salalarynda eńbek etedi.
Almatyda 2022 jylǵy 1 qańtardaǵy jaǵdaı boıynsha tirkelgen shaǵyn jáne orta kásipkerlik sýbektileriniń sany 295 861 birlikti qurady. 2022 jylǵy qańtar-naýryzda ótken jyldyń tıisti ezeńimen salystyrǵanda ónim shyǵarý (salystyrmaly baǵalarda) 28,5%-ǵa ulǵaıdy, jumyspen qamtylǵandar sany 17,4%-ǵa ósti jáne jumys istep turǵan sýbektilerdiń sany 2022 jylǵy 1 sáýirde 10,6%-ǵa ósti.
2022 jylǵy qańtar-naýryzda shaǵyn jáne orta kásipkerlik sýbektileriniń ónim shyǵarýy 2854,6 mlrd teńgeni qurady. SHOK sýbektileriniń jalpy sanynda jeke kásipkerlerdiń úlesi 61%, shaǵyn kásipkerliktiń zańdy tulǵalary 38,1%, orta kásipkerliktiń zańdy tulǵalary 0,3%, sharýa nemese fermer qojalyqtary 0,6% qurady.
Búgin kórme aıasynda almatylyq sán salasyndaǵy dızaınerler sán sherýin ótkizdi. Qonaqtar arasynda syılyqtar utysy oınatyldy. Almatyda «Qazaqstannyń úzdik taýary» óńirlik kórme-baıqaýy 29,30,31 shilde ótedi.
30 shildede KASE bırja qory, «Damý» kásipkerlikti damytý» qorynyń ókilderi kásipkerlerge arnalǵan qoldaý, memlekettik baǵdarlamalar jaıynda aqparat berip, sheberlik sabaqtaryn ótkizedi. Qonaqtar arasynda syılyq utysy oınatylady.
Al 31 shilde kórme-baıqaýdyń jeńimpazdary anyqtalyp, marapattaý rásimi uıymdastyrylady. Óńirlik irikteý jeńimpazdary elordada Qazaqstan Respýblıkasy Prezıdentiniń qatysýymen ótetin respýblıkalyq baıqaýǵa joldama alady. Kórmeniń sońǵy kúni konserttik baǵdarlama uıymdastyrylady.