Almatydaǵy Respýblıka saraıynda Mádenıet jáne óner qyzmetkerleri kúnine arnalǵan saltanatty shara ótti.
Shara aıasynda ult rýhanıatyn órge súırep, shahardyń mádenı ómirine eleýli úles qosyp júrgen sala maıtalmandary marapattaldy.
Sýretshiler, dızaınerler, ártister, sırk jáne mýzeı qyzmetkerleri, kitaphanashylar syndy túrli baǵyttaǵy mádenıet janashyrlary memlekettik jáne vedimistik nagradalarǵa ıe boldy.
Saltanatty jıynǵa Almaty qalasy ákiminiń orynbasary Ásem Núsipova qatysyp, mádenıet salasyndaǵy tabysty qyzmeti úshin marapat ıelerine qurmet kórsetti.
Qazaqstan Respýblıkasy Prezıdentiniń Jarlyǵyna sáıkes, mádenıetti damytýǵa qosqan zor úlesi úshin Almaty qalasy mýzeıler birlestiginiń ǵylymı qyzmetkeri Erbolat Áýezov «Parasat» ordenimen marapattaldy.
– Ómirimniń basym bóligin mádenıet salasyna jáne Almatynyń damýyna arnadym. Búgingi shara men úshin bir jaǵynan saǵynysh bolsa, ekinshi jaǵynan – qýanysh pen jańǵyrýǵa degen sezim. Bul men úshin ekinshi jastyq shaq sekildi. Eńbegimdi elep, kóp jylǵy jumysymdy baǵalaǵany úshin Memleket basshysyna jáne qala ákimine alǵys aıtamyn, – dedi Erbolat Áýezov marapat alý sátinde.
«Qurmet» ordeni ortalyqtandyrylǵan kitaphana júıesi fılıalynyń meńgerýshisi Qýanysh Isabekovaǵa, IL CANTO vokaldyq kvartetiniń ánshileri – Maqsat Samatov, Jiger Sathanov pen Bolat Qanagatovqa, sondaı-aq «Sazgen sazy» ansambliniń artısi Yqylas Nurǵalıevke tabystaldy.
Al «Eren eńbegi úshin» medalimen «Alataý» teatrynyń aktrısasy Alma Amanjolova, Qazaq memlekettik sırkiniń akrobaty Nurlan Alshynbaev jáne 5-studio TV Production dırektory Tolqyn Sadykova marapattaldy.
«Qazaqstannyń eńbek sińirgen qaıratkeri» ataǵy Memlekettik qýyrshaq teatrynyń aktrısasy Kúljamılá Ilásovaǵa, kompozıtor Vladımır Pıtersevke, sýretshi Rýstam Mýsaevqa jáne aktrısa Jarkynaı Shalqarǵa berildi.
Qazaqstan Respýblıkasy Prezıdentiniń Alǵys haty men tósbelgisine Abaı atyndaǵy Qazaq ulttyq opera jáne balet teatrynyń artısi Aıajan Qýanyshálıeva men halyqaralyq baıqaýlardyń laýreaty Ulbolsyn Kenjebaıqyzy ıe boldy.
«Mádenıet salasynyń úzdigi» tósbelgisimen Almaty haıýanattar baǵy dırektorynyń orynbasary Aǵybaı Ájibaev, Memlekettik qýyrshaq teatrynyń artısi Bolat Momynjanov jáne estradalyq-sımfonıalyq orkestrdiń mýzykanttary – Vladımır Demchenko, Rıma Ahmetova, Aınash Jaıylbekova-Sarbýfına, Meıirgúl Jalpaqova, Botagóz Qoıshybaeva, Valerıı Nasıbýlın men Alekseı Tımofeev marapattaldy.
– Almaty – mádenıettiń basty ordasy. Bul qalada el maqtanyshyna aınalǵan tulǵalar ómir súrip, ónerge adal qyzmet etti. Muhtar Áýezov, Sháken Aımanov, Shara Jıenqulova, Roza Baǵlanova syndy alyptar óz izi men mektebin qaldyrdy. Búginde olardyń jolyn jalǵap, qalamyzdyń rýhanı damýyna úles qosyp júrgen daryndy óner ıelerine shynaıy alǵysymyzdy bildiremiz, – dedi qala ákiminiń orynbasary Ásem Núsipova.
Qazaqstan Respýblıkasy Mádenıet jáne aqparat mınıstrliginiń Qurmet gramotasy ortalyqtandyrylǵan kitaphana júıesiniń kitaphanashysy Gúlbarshyn Býlanbaeva men dırıjór Nıkıta Belákovqa tabystaldy. Al Almaty haıýanattar baǵynyń qyzmetkeri Baǵıla Ibragımova mınıstrdiń Alǵys hatyna ıe boldy.
– Mádenıet – ómirimizge mán men sulýlyq syılaıtyn, adamzattyń damýyna túrtki bolatyn rýhanı kúsh. Ásirese, tek belgili ártister ǵana emes, sahna syrtyndaǵy qyzmetkerlerdiń de eńbegi baǵalanǵanyna qýanyshtymyn. Men úshin qarapaıym alǵys hattyń ózi – zor qurmet. Bul – elep, eskerip otyrǵanynyń belgisi. Almaty – rasynda mádenı astana, al onyń damýy – óz isine berilgen mamandar men qala basshylyǵynyń janashyrlyǵynda, – dedi Qazaqstannyń eńbek sińirgen qaıratkeri, estrada jáne opera ánshisi Tolqyn Zabırova.
Almaty qalasynyń ákimi Erbolat Dosaevtyń atynan mádenıet pen ónerge úles qosyp, tarıhı murany saqtaýǵa atsalysqan birqatar azamattarǵa Alǵys hattar tabys etildi. Olardyń qatarynda: Ságimgúl Qarabalına, Raýzıa Tursynbekova, Igor Blagodarnyı, Baqyt Áldıbekov, Tolqyn Zabırova, Venera Alpysbaeva, Alıar Ótetileý, Asylbek Eńsepov, Bahtıar Taılaqbaev, Tatána Adelgazınova, Laýra Shýlenbaeva, Batyr Januzaq, Marlen Maratov, Qaırat Botabekov, Aıda Qaýmenova, Shoqan Murathan, Sársenbaı Qalı, Ásıa Haırýlına, Kamılla Lı, Anara Ábjanova men Nellı Býbe bar.