Almatynyń Bostandyq aýdanynda 1 qyrkúıekke deıin eki kóshede kólik qozǵalysy ishinara shekteledi, - dep habarlady aqshamnews.kz.
Aldaǵy jylytý maýsymyna daıyndyq aıasynda Almaty qalasynyń Bostandyq aýdanynda 1984 jyly paıdalanýǵa berilgen shamamen 2,7 shaqyrym jylý magıstralin aýystyrý kózdelip otyr. Osyǵan baılanysty qalanyń eki kóshesinde kólik qozǵalysy ýaqytsha shekteledi.
10 maýsymnan bastap 1 qyrkúıekke deıin kólik qozǵalysy Qojanov kóshesiniń boıymen Gagarın kóshesinen bastap Jarokov kóshesine deıin, sondaı-aq, Jarokov kóshesiniń boıymen Qojanov kóshesinen bastap Dýnaevskaıa kóshesine deıin ońtústik baǵytta kólik qozǵalysy shekteledi. Soltústik baǵytta kólik qozǵalysy eki baǵytta uıymdastyrylady.
Ýaqytsha shekteýler kórsetilgen kóshe ýchaskesiniń júrgin bóliginiń astymen ótetin magıstraldyq qubyr jelisiniń josparly qaıta qurý jumystarynyń qaýipsizdigin qamtamasyz etý maqsatynda engiziledi.
Bul kezeńde tutynýshylarǵa ystyq sý berý úzilmeıdi.
Bul jylý qubyry 97 kópqabatty turǵyn úıdi, 12 jeke turǵyn úıdi, 4 balabaqshany, 2 medısınalyq mekemeni jáne 27 ózge de nysandy jylý energıasymen jáne ystyq sýmen qamtamasyz etedi.
Jalpy, bıyl qala boıynsha 39 km jylý jelisin qaıta jańǵyrtý josparlanǵan. Bul tozý deńgeıin 54%-ǵa deıin azaıtýǵa múmkindik beredi.
Eske salamyz, qozǵalysty shekteýge qatysty barlyq aqparat Almaty.kz saıtynda, @AlmatyJoly Telegram-arnasynda, aýdandyq ákimdikter men basqarmalardyń áleýmettik jelilerinde, sondaı-aq «2GIS» jáne «Iandeks kartalary» servısterinde ornalastyrylǵan.
Ýaqytsha qolaısyzdyqtarǵa túsinistikpen qaraýlaryńyzdy suraımyz.