68 jastaǵy Krıstın Sornın bir jyl buryn júregine eki ret kúrdeli ota jasatqan. Ota kezinde ol esin bilip jatqan, óıtkeni dárigerler tek júrek tusyn ǵana jansyzdandyrǵan. Ólim men ómir arasynda arpalysqan keıipkerimizge ota kezinde Dımashtyń daýsy demeý bolǵan kórinedi.
Kýmıriniń týǵan jerin kórý úshin 7 myń shaqyrymdy artqa tastap, armanyn oryndaýǵa kelgen fransýz áıel Aqshamnews.kz saıtyna eksklúzıv suhbat berdi. Onyń áńgimesi – ómirge qushtarlyqtyń, ónerge adaldyqtyń jáne shynaıy mahabbattyń sımvoly.
"Meni ólimnen eki adam qutqardy. Biri - Dımash, ekinshisi - kardıologym"
Ómir boıy sportpen shuǵyldanǵan Krıstınniń densaýlyǵy ýaqyt óte syr bere bastaǵan. Dárigerler keıipkerge júrek-qan tamyry aýrýy dıagnozyn qoıyp, ota jasaý keregin aıtqan. Bir qyzyǵy, dáriger mundaı kúrdeli otany jasaý barysynda Krıstınniń júrek tusyn ǵana jansyzdandyrǵan. Keıipker 2 saǵat boıy esin bilip jatqan.
"Árıne, qatty qoryqtym, qobaljydym. Dárigerler meni tynyshtandyrý úshin "Sizge ne demeý beredi?" dep surady. Men oılanbastan "Dımashtyń áni" dep jaýap berdim. Olar Dımashtyń tegin áreń jazǵany esimde. Sol bir qorqynyshty sátte onyń daýysy maǵan qarańǵydaǵy shamdaı úmit berdi", – deıdi Krıstın.
Krıstın Sornın – Fransıada turatyn zeınetker. Ol saqtandyrý salasynda qyzmet etse de, bos ýaqytynda teatr qoıylymdaryn sahnalap, eki jumysty qatar alyp júrgen. Keıin ol qoıylymdardy sahnalaý ónerin úırený úshin kúıeýimen birge Argentınaǵa kóship, ıspan tilin meńgergen. Qazir zeınette. Krıstın bos ýaqytynda sýret salyp, roman jazady. Onyń shyǵarmashylyǵyna shabyt bergen adam – Dımash.
"Bir estigennen eleń ete qaldym"
Pandemıa kezinde úıde otyryp qalǵan Krıstın qatty qulazyǵanyn aıtady. Damylsyz oıǵa shomylǵan ol Dımashtyń ónerimen kezdeısoq tanysady.
"Bir kúni ǵalamtordan Dımashtyń kezdeısoq ánin tyńdap qaldym. "Bul kim ózi?" degen suraq keldi. Sebebi men adam daýsyna kóp mán beretinmin. Al onyń daýsy óte erekshe. Alǵash estigen ánim – "Umytylmas kún". Sol sátten bastap ol meni baýrap aldy", – deıdi Krıstın.
Fransýz jankúıeriniń aıtýynsha, ol án tyńdaǵanda mátinniń maǵynasyna emes, oryndaýshynyń daýysy men emosıasyna mán beredi. Dımashtyń ónerindegi eń áserli tus – onyń júris-turysy, kózi men ishki álemi arqyly ánniń mánin tyńdarmanǵa jetkizýi.
"Mysaly, "Soǵys pen beıbitshilik" ánin alaıyq. Men onyń sózin tolyq túsinbesem de, Dımashtyń emosıasy, daýsy, sahnadaǵy bolmysy arqyly bul ánniń ne týraly ekenin júregimmen sezemin. Ol án aıtqanda janyn salady", – deıdi ol erekshe bir tolqynyspen.
"Ómirimde eki-aq adamnyń jankúıeri boldym"
Krıstın Sornın ómirinde eki adamnyń ǵana jankúıeri bolǵan. Biri – bala kezde ónerge ǵashyq qylǵan fransýz akteri Jan Mare, ekinshisi – júregine úmit syılaǵan qazaqstandyq ánshi Dımash Qudaıbergen.
"On eki jasymda alǵash ret Jan Mare esimdi akterdiń ónerin kórip, teatrǵa ǵashyq boldym. Onyń oıny men harızmasy meni teatr álemine jeteledi. Sol sátte bolashaǵymdy ónermen baılanystyramyn dep sheshtim. Keıinirek, rejıssýrany oqydym, qoıylymdar qoıdym. Jan Mare meniń alǵashqy shabytym boldy", – deıdi keıipker.
Keıin akterdiń qumyrashy bolǵanyn bilgen Krıstın onyń tek sahnada emes, ómirde de ónermen tynystaıtynyna tańyrqapty. Jan Mare ómirden ótken soń, Krıstın onyń turǵan mekenine arnaıy baryp, jumys istegen sheberhanasyn kóredi.
"Onyń jumysyn kórip, onyń júrgen izimen júrý – erekshe áserge toly sát. Bir sátke bolsyn kýmırime jaqyndaı túskendeı boldym. Bul sát men úshin armandar oryndalatynyna degen senimime dálel boldy", – deıdi Krıstın.
Eger Jan Mare keıipkerdi teatr ónerine baýlysa, Dımash sýretke shabyttandyrǵan. Ol Qazaqstan týraly kóp izdenip, munda kelýdi taǵatsyzdana kútken.
"Qazaqtardyń júzi jyly.."
Krıstın Almatyǵa kelgen kúni bizben tildesýge kelisti. Ol qalany aralap úlgermegenimen, turǵyndardyń jyly júzi birden kózge túsetinin jasyrmady.
"Buryn Qazaqstandy tek ǵalamtordan baqylap júretin edim. Al qazir osynda kelip, bárin óz kózimmen kórgim keldi. Nege Almaty? Sebebi bul qalada búkil Qazaqstannyń tabıǵatyn tamashalaýǵa bolady. Adamdary da kúlimdep turady. Munda bári ashyq, jyly júzdi. Almatyǵa kelgeli jaqsy sezimdemin", – deıdi ol.
Krıstın Almatyǵa kelýdi burynnan josparlap qoıǵanyn aıtty. Densaýlyǵyna baılanysty, ókinishke qaraı, Dımashtyń Almatyda ótken fan-kezdesýine qatysa almaǵan. Biraq ol buǵan moıymaıdy. Kerisinshe, qalanyń ásem tabıǵatyn aralap júrip, óner ıesin kóshede kórip qalsam ǵoı dep armandaıdy.
Almatyǵa kelgen qonaq on kún ishinde elimizdiń ásem jerleri Kólsaı, Qaıyńdy, Altynemelge barýdy josparlap otyr. Bolashaqta mindetti túrde Astanaǵa, ánshiniń meıramhanasyna, Aqtóbedegi Dımash oqyǵan mektep pen mýzeıine barǵysy keletinin jasyrmady.
"Kúıeýim men renjigende "Dımash emespin ǵoı" dep ázildeıdi"
Krıstınniń kúıeýi de, eki uly da onyń bul qyzyǵýshylyǵyna túsinistikpen qaraıdy. Tipti kenjesi shyǵarmashyl adam bolǵan soń, anasyna shabyt bergen ánshini qoldaıdy.
"Ulym ótkende "Júregińe ota jasaldy, Qazaqstanǵa baryp ólseń de, armanyń joq shyǵar" dep qaljyńdaıdy. Al kúıeýimmen ursysyp qalsaq, ol maǵan "Dımash emespin ǵoı" dep qaljyńdaıdy. Biraq olar meni túsinedi. Sebebi meniń ómirge qulshynysymdy kórip otyr. Dımash – men úshin kýmır ǵana emes, shabyt", – deıdi ol.
"Shyǵarmashylyǵymdaǵy sharyqtaý shegi"
Krıstın Sornın Dımashtyń ónerimen tanysqaly shyǵarmashylyq sharyqtaý shegine jetkenin aıtty.
"Sýret sala bastadym, roman jazýǵa otyrdym. Shabytym ashylyp, ózimdi qaıta tapqandaı boldym. Bir jyldan beri roman jazyp júrmin. Ázirge onyń qandaı bolaryn bilmeımin. Fılm, álde teatr qoıylymy bolaryn ýaqyt kórsetedi", - dep qorytyndylady sózin keıipker.
Ómirdiń eń qıyn sátterdi adamdy óner qutqara alady. Krıstınniń oqıǵasy – munyń dáleli.