Koronavırýs qaýpi seıiler emes
Almatyda koronavırýs juqtyrǵan 35 júkti áıeldiń aýrýhanada emdelip jatqanyn onlaın brıfıń barysynda qalalyq qoǵamdyq densaýlyq saqtaý basqarmasy basshysynyń orynbasary Laýra Myrzaǵalı málim etti, dep habarlaıdy Almaty-akshamy.kz QazAqparat saıtyna silteme jasap.
«Bizdiń aýrýhanalarda koronavırýs juqtyrǵan 35 júkti áıel em qabyldap jatyr, onyń bireýiniń jaǵdaıy óte aýyr, ekeýiniń jaǵdaıy aýyr jáne eki naýqas jasandy tynys alý apparatyna qosylǵan. 283 áıel úıde dárigelerdiń baqylaýmen em alyp jatyr»,- dedi spıker.
Jalpy, ınfeksıalyq stasıonarlarda 1 788 adam bar (tósek-orynnyń jalpy sany –5230), onyń ishinde 53-i - bala.
«Medısınalyq-sanıtarlyq alǵashqy kómek mobıldi brıgadalarynyń jáne Telemedısına ortalyǵynyń ambýlatorıalyq baqylaýynda 4 448 pasıent bar. Onyń ishinde indet belgileri bar, ortasha aýyr jaǵdaıda – 4 190 naýqas. 159 adamda koronavırýs belgileri joq», - dedi Laýra Myrzaǵalı.