Almaty qalasynyń ákimi Darhan Satybaldynyń tóraǵalyǵymen «Taza Qazaqstan» jalpyrespýblıkalyq ekologıalyq aksıasynyń júzege asyrylý barysyna arnalǵan jumys keńesi ótti.
Qala ákimi ekologıa men abattandyrý máselesine júıeli túrde qaraýdyń mańyzyn atady. Osyǵan oraı, qala aýmaǵyn kógaldandyrýmen, sanıtarlyq tazalyqpen jáne jaıly qalalyq ortany qalyptastyrýmen aınalysatyn jańa arnaıy kásiporyn qurý tapsyryldy.
«Bul qurylym tek kógaldandyrý men abattandyrýǵa, qalada jaıly orta qurýǵa jaýapty bolýǵa tıis. Olar ózderi jergilikti jerlerge shyǵyp, jaǵdaıdy jaqsartýǵa bolatyn aýmaqtardy anyqtaýy qajet», — dedi Darhan Satybaldy.
Keńeste «Taza Qazaqstan» aksıasynyń aralyq qorytyndysy da qaraldy. Úshinshi toqsan bastalǵaly beri Almatyda 3 myńnan astam adamnyń qatysýymen 30-ǵa jýyq is-shara ótkizildi.
Turǵyndarmen baılanystyń tıimdi quraly retinde TazaQazBot sıfrlyq platformasy jumysyn jalǵastyrýda. Jyl basynan beri osy bot arqyly turǵyndardan 4 myńnan astam ótinish túsken.
Talqylaý barysynda qalanyń jasyl qoryn kútip-baptaý jaıy da sóz boldy. Túgendeý kezinde 16 myńnan astam qýraǵan jáne apatty jaǵdaıdaǵy aǵash anyqtalyp, olardyń 5 myńnan astamy kesildi. Sonymen qatar sanıtarlyq maqsatta butaqtaryn kesý, buta otyrǵyzý jáne býferlik jasyl aımaqtardy abattandyrý jumystary qatar júrgizilip jatyr.
Basty máseleniń biri — avtomatty sýarý júıeleriniń jumysqa jaramdylyǵy. Monıtorıń barysynda 56 ýchaskede aqaýlar anyqtalyp, bul kópjyldyq jasyl jelekterdiń jaǵdaıyna tikeleı áser etip otyr. Osyǵan baılanysty ákim júıelerdiń úzdiksiz jumysyn baqylaýdy kúsheıtip, jasyl aımaqtardy sapaly kútip-baptaýdy qamtamasyz etýdi tapsyrdy.
Keńes qorytyndysy boıynsha shahar basshysy bekitilgen josparǵa sáıkes is-sharalardy buljytpaı oryndaý, turǵyndardyń ekologıalyq saýatyn arttyrý baǵytyndaǵy jumysty jandandyrý jáne kásiporyndar men uıymdardyń, qala turǵyndarynyń kóptep qatysýymen senbilikterdi júıeli túrde ótkizý syndy birneshe naqty tapsyrma berdi.