Almatyda jyl basynan beri alıment alýshylardyń paıdasyna 500 mıllıonnan astam teńge óndirilgen. Bul týraly búgin Almaty qalasy Ádilet departamentiniń basshysy Balaıym Kesebaeva Óńirlik komýnıkasıalar qyzmeti alańynda ótken brıfıńte aıtty, dep habarlaıdy aqshamnews.kz
Spıkerdiń aıtýynsha, jekemenshik sot oryndaýshylarynyń qaraýynda 22 688 alımenttik is bolǵan, onyń tek 70-i naqty oryndalǵan, 2 879-y aıaqtalǵan, al 1 000 is problemaly bolyp qalýda.
«Jyl basynan beri alıment alýshylardyń paıdasyna 500 mıllıonnan astam teńge (568 361 752 teńge) óndirildi. Osy sharalar aıasynda 37 avtokólik pen 5 jyljymaıtyn múlik iske asyrylǵan», - dedi B.Kesebaeva.
Alaıda, alımentter boıynsha sot sheshimderin oryndaý kóbine boryshkerdiń aqshasynyń, turaqty jumys ornynyń nemese óndirip alýǵa jatatyn múlkiniń bolmaýyna baılanysty kúrdelene túsedi.
«Osyndaı qıyndyqtarǵa jaýap retinde jyl basynan beri Jeke sot oryndaýshylarynyń óńirlik palatasymen jáne Halyqty jumyspen qamtý ortalyǵymen birlesip úsh jumys jármeńkesi uıymdastyryldy. Osy sharalardyń arqasynda 234 boryshker jumyspen qamtyldy, bul alıment óndirip alý tıimdiligin edáýir arttyrdy. Eger boryshker jumysqa ornalasýdan bas tartsa, ony ákimshilik nemese qylmystyq jaýapkershilik kútedi», – dep tolyqtyrdy spıker.
2024 jyly engizilgen jańalyqtardyń biri – shaǵyn aıyppuldar men qaryzdardy óndirip alýǵa baǵyttalǵan «Jeńildetilgen óndiris» baǵdarlamasy. Kesebaevanyń aıtýynsha, 20 AEK-ke deıingi aıyppuldar 20 tamyzdan bastap avtomattandyrylǵan júıe (GAI SIP) arqyly óndiriledi. Bul júıe, eger boryshker sheshimmen kelisse, jeke sot oryndaýshylarynyń qatysýynsyz-aq óndirip alý prosesin jeńildetedi.
«Biz azamattarymyzdyń múddesi úshin atqarýshylyq óndiris tıimdiligin arttyrýǵa jáne rásimderdi jaqsartýǵa baǵyttalǵan jumysty jalǵastyramyz. Jeńildetilgen óndiristiń engizilýi – óndirip alý prosesiniń avtomattandyrylýy men ashyqtyǵyna qaraı jasalǵan úlken qadam», – dep qorytyndylady Balaıym Kesebaeva.
Aıta keteıik, Almaty qalasynda 24 memlekettik jáne 291 jekemenshik sot oryndaýshysy qyzmet atqarýda, olardyń negizgi mindeti – sot aktilerin májbúrli túrde oryndaý.
Buǵan deıin, aqshasyn baladan aıap, býkmekerge bergen týraly jazǵan edik.