Almatyda jyl basynan beri zańsyz aınalymnan 41 mln. 433 myń 748 teńgeni quraıtyn 39 265 birlik kontrafaktilik ónimder tárkilendi. Quqyq buzýshylarǵa 5 865 348 teńge aıypul salyndy. Bul týraly Óńirlik komýnıkasıalar qyzmetiniń brıfıńinde Departament basshysy Balaım Kesebaeva málim etti, dep habarlaıdy aqshamnews.kz.
2024 jyldyń 9 aıynda jeke jáne zańdy tulǵalardyń ótinishteri negizinde taýar tańbasyn zańsyz paıdalaný faktisi boıynsha 80 kezekten tys tekseris júrgizildi.
«Tekserýler bazarlarda, saýda jáne bıznes ortalyqtarynda, sondaı-aq belgili brendterdiń kontrafaktilik taýarlary satylatyn qoımalarda júrgizildi. Tárkilengen ónimderdiń ishinde: uıaly telefondarǵa arnalǵan aksesýarlar, kıim, balalar taýarlary men oıynshyqtar, táttiler, teledıdarlar, avtomobıl bólshekteri, motor maılary jáne basqa da taýarlar bar. Tekserý nátıjesinde zańsyz aınalymnan 41 mln. 433 myń 748 teńgeni quraıtyn 39 265 birlik kontrafaktliik ónimder tárkilendi. Sot sheshimimen quqyqbuzýshylarǵa 5 865 348 tenge aıypul salyndy», - dedi B.Kesebaeva.
Sondaı-aq, jyl basynan beri Ádilet departamenti 2 870 000 teńgeni quraıtyn «WD-40» saýda belgisiniń zańsyz beınesi bar 12 000 jýyq dana kontrafaktilik ónimdi tárkiledi. Sot qaýlysyna sáıkes kináli tulǵalarǵa aıyppul salynyp, tárkilengen taýar joıyldy.
Aıta keterligi, departament jumysy aıasynda atalǵan kezeńde halyqtyń zıatkerlik quqyqtardy qorǵaý týraly habardarlyǵyn arttyrýǵa baǵyttalǵan reıdter ǵana emes, aqparattyq kampanıalar da ótkizildi.
Sondaı-aq, elimizdegi kreatıvti ekonomıkanyń aýqymdy damýy úshin jaǵdaı jasaýǵa basa nazar aýdaryldy. Onyń ishinde zıatkerlik menshikti zańdy tásildermen qorǵaý.
Sonymen qatar, Departamentte zıatkerlik menshiktiń jańa obektileri — «geografıalyq nusqamalar» engizilgeni týraly habarlandy, olar elimizdiń belgili bir óńirlerinde óndiriletin taýarlardy biregeı dep bólýge kómektesedi. 2023 jyly «Túrkistan shokolady», «Túrkistan balmuzdaq», «Qaraǵandy balmuzdaq», «Chacha-CHacha» jáne áıgili «Almaty aporty» sıaqty taýarlar tirkelgen.