Almaty turǵyndary júrgizýshi kýáligin alý úshin AvtoHQO-ǵa (halyqqa qyzmet kórsetý ortalyǵy) tym erte barýda, dep habarlaıdy almaty-akshamy.kz
Almaty halyqqa qyzmet kórsetý ortalyǵynyń málimetinshe, qazirgi tańda Almatyda júrgizýshi kýáligin alýǵa arnalǵan emtıhan jalǵyz avto HQO-da tapsyrylady.
«Almatyda barlyq HQO-lar men avtoHQO-lar saǵat 9.00-18.00 aralyǵynda jumys isteıdi. Senbi, jeksenbi - demalys kúnderi. Degenmen, tańnan kelip, dalada kezek alyp turatyn adamdardyń júktemesin azaıtý úshin avtoHQO jumysyn saǵat 8.00-den bastaıdy», - dedi Almaty HQO baspasóz qyzmetinde.
Aıtý kerek, búginde Almatyda kólik ıeleri júrgizýshi kýáligin aýystyryp, kólikterin qaıta tirkeı alatyn bes mamandandyrylǵan halyqqa qyzmet kórsetý ortalyǵy jumys istep tur.
«Bul rette olardyń ekeýinde ǵana praktıkalyq emtıhan tapsyrýǵa arnalǵan avtodrom bar. Olar «Saıaly» jáne «Kemel» yqshamaýdandarynda», - dedi Almaty HQO-nyń ókilderi.
Biraq, «Saıaly» yqshamaýdanyndaǵy avtoHQO-nyń avtodromy búginde jańartylýda, sondyqtan júrgizýshiler tek «Kemel» yqshamaýdanynda ornalasqan №6 bólimde emtıhan tapsyra alady.
«Emtıhan tapsyrýshylardy múmkindiginshe kóp qabyldaýǵa úlgerý úshin bólimniń jumys kestesi qaıta qaraldy. Qazir ol tańǵy 9:00-den emes, 8:00-den bastap, 18:00-ge deıin jumys isteıdi. Bir kúnde arnaıy HQO shamamen emtıhan tapsyratyn 200-ge jýyq klıentti qabyldap úlgeredi»,- dep málimdedi HQO-da.
«Saıaly» yqshamaýdanyndaǵy ýaqytsha jumys istemeıtin avtodromǵa kelsek, ol shamamen aǵymdaǵy jyldyń naýryz aıynda iske qosylýy tıis.