Almatyda japyraq jeıtin zıankester men zeń aýrýlarynyń qozdyrǵyshtaryna qarsy bıologıalyq óńdeýdiń tórtinshi kezeńi bastaldy. Aldyńǵy úsh kezeń aǵymdaǵy jyldyń sáýirinen tamyz aıyna deıin júrgizildi, dep habarlady Almaty qalasy ekologıa jáne qorshaǵan orta basqarmasynyń basshysy Serik Ádilbaev qala ákimniń orynbasary Á.Ábdiqadyrovtyń jumys sapary barysynda.
Aǵashtardyń turaqty jaǵdaıyn jaqsartý, saqtaý jáne olardyń ártúrli zıandy organızmderge tózimdiligin arttyrý úshin tórtinshi kezeń aıasynda bıoóńdeýmen 2,3 mln.astam aǵashty qamtý josparlanýda. Zıankester bıologıasynyń erekshelikterine súıene otyryp, emdeý túnde jáne tańerteń erte júrgiziledi.
Aǵymdaǵy jyldan bastap monofagtardyń zıankesterine barynsha áser etý úshin birinshi kezeń (vegetasıalyq kezeńniń bastalýy) kezinde terekti úsh ret óńdeý jáne ózge aǵashtardy eki ret óńdeý júrgizildi. Aıta ketý kerek, buryn ósimdikterdi bıologıalyq qorǵaý vegetasıalyq kezeńniń basynda tek bir ret júrgizildi, biraq mundaı óńdeý jıiligi monofag zıankesteri úshin jetkiliksiz, bul jasyl keńistikterdiń jaǵdaıyna teris áser etedi. Jumysta klımattyq faktorlardy eskere otyryp, QR aýmaǵynda qoldanýǵa ruqsat etilgen jáne adamdarǵa, qustar men janýarlarǵa zıansyz, qaýiptiligi tómen synypty sertıfıkattalǵan bıologıalyq jáne keıbir jaǵdaılarda hımıalyq preparattar (P-4) paıdalanylady.
Aýa-raıy qolaıly jáne jaýyn-shashynsyz kezde tórtinshi kezeńdi 20 qyrkúıekte aıaqtaý josparlanýda.