18 jáne 35 jas aralyǵyndaǵy jastar klýbtyń múshesi bola alady
Almaty qalasynyń Óńirlik komýnıkasıalar qyzmetiniń alańynda kásipkerler klýbynyń ashylýy jáne jastar úshin basqa da múmkindikter týraly "Kásipkerler klýby" jobasynyń basshysy Temirlan Salı, Almaty qalasy Jumyspen qamtý jáne áleýmettik baǵdarlamalar basqarmasynyń eńbek naryǵyn damytý bóliminiń bas mamany Kúlásh Ádilbekova jáne «Agrarlyq nesıe korporasıasy» AQ nesıeleý bóliminiń bas mamany Nurbergen Tańyrbergenuly aıtyp berdi, dep habarlaıdy Almaty-akshamy.kz.
Jobanyń maqsaty - Almaty qalasynda kásipkerlik qyzmetti júzege asyratyn jas kásipkerlerdiń turaqty qoǵamdastyǵyn qurý jáne damytý.
Uıymdastyrýshylar atap ótkendeı, klýb óz bıznesin ashýǵa jáne damytýǵa nıet bildirgen jastardy biriktirýge arnalǵan.
"Almaty qalasynda jastar saıasaty basqarmasynyń qoldaýymen “Jas kásipkerler klýby” ashyldy. Biz jastarǵa memlekettik qoldaý, granttar jáne olarǵa arnalǵan túrli múmkindikter týraly aıtyp, qoldaý kórsetemiz", - dedi T. Salı.
Almaty qalasynda turatyn 18 jáne 35 jas aralyǵyndaǵy jastar klýbtyń múshesi bola alady.
Klýb aıasynda arnaıy tálimgerlik jáne saraptamalyq konsýltasıalar, bıznes-jattyqtyrýshylarmen qarym-qatynas, isker qoǵamdastyqpen, bıznes ókilderimen kezdesýler uıymdastyrylady. Sondaı-aq, pikirtalas, konferensıa, dárister sıaqty túrli formattaǵy onlaın is-sharalar ótkiziledi. Oǵan qosa sarapshylar men tájirıbeli kásipkerler óz tájirıbelerimen bólisetin bolady.
Klýb músheleri qoǵamdastyqtyń bir bóligine aınalyp, bir-birimen tájirıbe almasa alady, sonymen qatar qalanyń tanymal kásipkerlerimen ózara árekettesýge múmkindik alady.
Óz kezeginde, "Agrarlyq nesıe korporasıasy" AQ kredıtteý bóliminiń bas mamany Nurbergen Tanyrbergenuly jas kásipkerler úshin qolaıly múmkindik - 2,5% mıkrokredıtteý týraly aıtyp berdi.
"Osy jyldyń naýryz aıynan bastap bizde jastarǵa shaǵyn nesıe berý baǵdarlamasy bastaldy. Qazirgi ýaqytta biz nesıelik ótinishterdi qarastyramyz jáne qabyldaımyz. Dál qazirgi ýaqytta alǵashqy ótinimder maquldanyp, qarjylandyrý kezeńinde tur", - dep bólisti ol.
Almaty qalasynyń Jumyspen qamtý jáne áleýmettik baǵdarlamalar basqarmasy eńbek naryǵyn damytý bóliminiń bas mamany Kúlásh Ádilbekova atalmysh maqsattarǵa baılanysty Almatyda myń adamǵa 5 mlrd teńge bólingenin atap ótti.
Qaryz alýshylarǵa qoıylatyn negizgi talaptar:
- 21 jastan 35 jasqa deıingi jastar
- JK túrindegi tirkeýdiń bolýy (ótinim berý kezinde 5 jyldan aspaýy qajet)
- sońǵy eki jylda nesıe tarıhy boıynsha 180 kúnnen artyq keshiktirýdiń bolmaýy
- ótinish bergen kezde salyq jáne nesıe boıynsha bereshektiń bolmaýy
Kredıtteýdiń eń joǵary somasy 5 mln teńgege deıin, al syıaqynyń paıyzdyq mólsherlemesi 2,5% jyldyq mólsherlemeni quraıdy. Jyljymaly (mamandandyrylǵan tehnıka) jáne jyljymaıtyn múlik (turǵyn úı, páter, aýyl sharýashylyǵy baǵytyndaǵy jer ýchaskeleri) túrindegi kepildiń bolýy mindetti shart bolyp tabylady.