Almatyda jańa stadıon men múmkindigi shekteýli jandarǵa arnalǵan sport ortalyǵy salynyp, «Medeýdi» jańartyp jatyr
Almatyda sport ınfraqurylymyn damytýǵa baǵyttalǵan keshendi jobalar júzege asyp jatyr. Almaty qalasy ákiminiń orynbasary Azamat Qaldybekov Óńirlik komýnıkasıalar qyzmetiniń alańynda osylaı dedi.
Nurkent shaǵyn aýdanynda 4 jabyq jáne ártúrli jabyndysy bar 10 ashyq korty qamtıtyn «Alataý» tenıs ortalyǵynyń qurylysy bitti. Raıymbek dańǵyly, 312 mekenjaıynda múmkindigi shekteýli jandarǵa arnalǵan arnaýly sport ortalyǵy da salynyp jatyr. Ony 2026 jyly salyp bitpek.
Basty basym baǵyttardyń biri – FIFA jáne UEFA standarttaryna saı 35 myń oryndyq jańa fýtbol stadıonynyń qurylysy. Sondaı-aq, Ortalyq stadıondy qaıta jańǵyrtý, tarıhı kelbetin saqtaı otyryp «Medeý» muz aıdynyn jańartý mene qalanyń ár aýdanynda alty dene shynyqtyrý-saýyqtyrý keshenin salý da josparlanǵan.
Bul jobalardy iske asyrýdyń basty maqsaty – sporttyń barsha turǵyndar úshin qoljetimdiligin arttyryp, Qazaqstannyń sport astanasy retindegi Almatynyń mártebesin nyǵaıtý.
Sonymen qatar, almatylyq sportshylar respýblıkalyq jáne halyqaralyq arenalarda joǵary nátıjeler kórsetip keledi. 2025 jyly olar 4 myńnan astam medal jeńip aldy: sonyń ishinde 3 534-i – Qazaqstan chempıonattarynda, 119-y – Álem kýbogynyń kezeńderinde, 298-i – Azıa chempıonattarynda jáne 68-i – álem birinshilikterinde. Aıryqsha jetistikterdiń qatarynda mánerlep syrǵanaýdan álem chempıonatynda Mıhaıl Shaıdorovtyń kúmis júldesi, sporttyq gımnastıkadan Narıman Kýrbanov pen Mılad Karımıdiń Álem kýbogyndaǵy jeńisteri, sondaı-aq jasóspirimder arasyndaǵy shahmattan eki dúrkin álem chempıony atanǵan Ksenıa Balabaevanyń tabysy bar.
Sondaı-aq, 8 almatylyq sportshy Qazaqstannyń ulttyq quramasy sapyna enip, IX Qysqy Azıa oıyndarynda 20 medal ıelenýge úles qosty. Almatylyqtardyń jetistigi qalany eldegi sporttaǵy jetekshi ortalyqqa aınaldyryp otyr.