Almaty qalasynda 2025 jyldyń basynan beri 4 jekemenshik jáne 2 joǵary oqý ornyna tıesili jataqhana paıdalanýǵa berildi. Jyl sońyna deıin taǵy 5 jataqhananyń qurylysy aıaqtalyp, iske qosylady. Bul týraly Almaty óńirlik komýnıkasıalar qyzmetinde ótken baspasóz máslıhatynda qala ákiminiń orynbasary Azamat Qaldybekov habarlady.
«Biz úshin Almatyda bilim alyp jatqan stýdentterdiń jaıly jaǵdaıda turýy asa mańyzdy. Osy baǵytta ınvestorlardy qoldaımyz, joǵary oqý oryndary men jeke áriptester úshin jańa múmkindikter usynamyz. Bul jaı ǵana qurylys emes, bul erteń qalany damytýǵa atsalysatyn jastarǵa jasalǵan ınvestısıa», - dedi Azamat Qaldybekov.
2025 jyldyń alǵashqy toǵyz aıynda qalada jalpy syıymdylyǵy 1 115 orynǵa arnalǵan 6 jataqhana iske qosyldy. Onyń tórteýi jekemenshik, ekeýi joǵary oqý oryndaryna arnalǵan. Jyl aıaǵyna deıin taǵy 4 934 orynǵa arnalǵan 5 nysan paıdalanýǵa beriledi.
Jobalardyń júzege asý qarqynyn arttyrý jáne bıznestiń qyzyǵýshylyǵyn kúsheıtý maqsatynda Almatydaǵy ulttyq joǵary oqý oryndary úshin ǵımarattardy jataqhanaǵa beıimdeýge beriletin memlekettik tapsyrys mólsheri ulǵaıtyldy. Buryn bul kórsetkish bir orynǵa 92 AEK bolsa, endi ol 182 AEK-ke deıin artty.
Bul ınvestorlar úshin ájeptáýir yntalandyrý bolyp otyr. Sonyń nátıjesinde jataqhana salý jedeldep, stýdentter zamanaýı ári jaıly turǵyn úımen qamtamasyz etiledi.
Stýdenttik jataqhanalar ınfraqurylymyn damytý – jastar úshin jaıly qala qalyptastyrýdaǵy júıeli jumystyń bir bóligi. Bul qalada árbir stýdent sapaly bilim alyp, damyp, óziniń áleýetin tolyqtaı júzege asyra alýǵa tıis.