Qazir áleýmettik jelide «Otbasylyq jan-jaldan aryltamyn, «Ómirińdi ózgertemin», «tabysyńdy kóbeıtemin» degent jarnama jetip artylady.
Biraq, kásibı psıhologtar olardyń barlyǵy bilikti maman emestigin aıtýda, dep habarlaıdy Almaty-akshamy.kz.
Shymkenttik mentor Perızat Qaqarbaıqyzynyń psıhologıa baǵytynda joǵarǵy bilimi joq. Degenmen, onyń qyzmetine suranys kóp ekenin jasyrmaıdy.
«Birinshi bastaǵanyma 6 jyl boldy. Ózimniń basymdaǵy problemalarymmen keldim. Otbasydaǵy jaǵdaı boıynsha. Sonyń sheshimin izdep ár jerge baryp, men qazir mentorlyqpen aınalysyp jatyrmyn ǵoı. Biz prámoı mıǵa kiremiz de, tabystyń kóbeımeýine ne sebep ekenin tabamyz da, transformasıa jasaımyz», - deıdi mentor Perızat Qaqarbaıqyzy.
Alaıda kásibı psıhologtar dıplomy joq mundaı mamandar jumysyna qarsy. Sholpan Ábilovanyń pikirinshe, dereksiz salynǵan oı qaýipti.
«Mentor retinde 50 adamǵa onlaın sabaq berýi múmkin, biraq adam ártúrli bolǵan soń tolyqqandy jetpeıdi, jetkenniń ózinde durys arnaǵa túspeýi múmkin. Sanaǵa salǵan oı jaǵynan qaýipti. Mysaly adam ózi qınalyp turǵan kezde, jany aýyryp turǵan kezde naqty bir dereksiz oı salynatyn bolsa ol qaýipti bolady», - deıdi psıholog Sholpan Ábilova.
Bul jaǵymsyz tendensıa batys elderinde de beleń alyp barady. Máselen, «PlusCare» vırtýaldy densaýlyq saqtaý platformasy Tic Tok-ta jarıalanǵan 500 beınerolıkke saraptama jasap, onyń 84 paıyzy adamdy shatastyratynyn, tipti qaýipti ekenin anyqtady. Qoǵam belsendisi Murat Bataı jalpy psıhologqa júginýdi qup kórmeıdi. Onyń oıynsha qazir bul salany tek tabys kózi úshin paıdalanatyndar kóp.
«Kez kelgen adamnyń basyna túsken qıynshylyqtardy joıý úshin adam birinshi óz otbasymen sodan keıin jaqyndarymen keńesip baryp sheshý kerek. Óziniń basyna túsken qıynshylyqty áleýmettik jelidegi psevdopsıhologtardyń keńesimen emes. Burynǵy ádisshe sheshken durys. Týystan artyq jaqyn joq. Al sol psıhologtar seans ótkizip, aqshasyn alǵannan keıin qatysy joq bolady», - deıdi qoǵam belsendisi Murat Bataı.