Abaı atyndaǵy alańda Almaty Food Fest 2022 halyqaralyq gastronomıalyq festıvali ótip jatyr
Týrızm basqarmasy munyń qalany halyqaralyq is-shara týrızminiń negizgi baǵytynyń biri retinde tanytý úshin uıymdastyrylǵanyn aıtady.
Almaty Food Fest 2022 aıasynda mádenı jáne oıyn-saýyq baǵdarlamasy qarastyrylǵan. Onda álemniń túrli eliniń ulttyq asy usynylǵan. Festıválge kelýshiler meksıka, grýzın, amerıka, azıa jáne qazaq taǵamdarynan dám tatady. Desert áýesqoılarynyń talǵamy da eskerilip, olar úshin arnaıy «táttiler kóshesi» uıymdastyryldy.
Sonymen birge qonaqtar aspaz baıqaýlary men utys oıyndaryna qatysyp, halyqaralyq deńgeıdegi arnaıy shaqyrylǵan aspazdardyń live cooking shoýyn tamashalap, aýyl sharýashylyǵy ónimderi men qolóner buıymdaryn satyp ala alady. Qazaqstandyq estrada juldyzdary áserli shoýdy jandy áýenmen terbetti.
Festıvál Kýveıt, Bahreın, Úndistan jáne basqa elderden kelgen tanymal sheteldik blogerlerdi de beı-jaı qaldyrmady. Olar óz elindegi ulttyq taǵamdardyń erekshelikterine toqtalyp, Qazaqstannyń dástúrli taǵamdaryna sholý jasady.
«Men naǵyz gýrmanmyn. Otanym Úndistanda 500-ge jýyq meıramhanaǵa bardym. Sizderdiń ulttyq taǵamdaryńyz týraly kóbirek bilip, jańa gastronomıalyq tájirıbe alý úshin Almatyǵa Almaty Food Festival 2022-ge arnaıy keldim,- dep úndistandyq fýd-bloger Rohıt Mavle áserimen bólisti.
Festıvál Abaı atyndaǵy alańda (Respýblıka Saraıynyń aldy) 29-30 qazan kúnderi ótedi. Ár kesh sońynda qonaqtar qazaqstandyq ártisterdiń ónerin tamashalaıdy:
29 qazan – Orda toby;
30 qazan – Qaırat Nurtas.