Túrkistan qalasynda «Olympic center» sport saraıynda alǵash ret qazaqtyń ulttyq kúresinen «Turan Barysy» Azıa Kýbogi bastaldy. Bul týraly Almaty-akshamy.kz Inform.kz-ke silteme jasap habarlaıdy.
Jarysqa Túrkıa, Ózbekstan, Ázerbaıjan, Qyrǵyzstan, Majarstan jáne Qazaqstan balýandary qatysyp jatyr. Sharanyń saltanatty ashylýynda Mádenıet jáne sport mınıstri Dáýren Abaev sportshylarǵa sáttilik tilep, mınıstrlik árdaıym ulttyq sportty damytýdy qoldaıtynyn jetkizdi.
«Sport pen mádenıet – barsha halyqtyń basyn bir arnaǵa qosatyn ortaq alań. Sonyń ishinde qazaq kúresi túrki jurtyna etene jaqyn óner túri. Baıyrǵy babalarymyz balýandyqty naǵyz jigittiń erekshe sıpaty dep bilgen. Qazaq kúresi buǵan deıin de «Álem Barysy», «Evrazıa Barysy», «Qazaqstan Barysy» sekildi jobalarymen halyqqa, álem jurtyna keńinen tanys. Búgin tusaýyn keskeli otyrǵan «Turan Barysy» bolashaqta sportsúıer qaýymnyń qyzyǵyp tamshalaıtyn úlken jobasyna aınalady dep senemin», - dedi Dáýren Abaev.
Sportshylar jeti salmaq sanatynda beldesedi: 55 kelige deıin, 60 kelige deıin, 66 kelige deıin, 74 kelige deıin, 82 kelige deıin, 90 kelige deıin jáne 90 keliden joǵary salmaqta.
Týrnır ashylýynda jerebe tartý rásimi ótti. Birinshi topta Ázerbaıjan, Ózbekstan, Majarstan quramalary, ekinshi topta Qyrǵyzstan, Túrkıa, Qazaqstan quramalary ózara myqtyny anyqtaıdy.
Týrnır Qazsport jáne TRT Avaz telearnalarynyń tikeleı efırinen kórsetiledi.
