Saıabaq Halıýllın kóshesi, 45A mekenjaıynda ornalasqan.
16 jeltoqsanda Almatyda Qazaqstan halyqtarynyń ertegileri saıabaǵynyń ashylýy ótedi, dep habarlaıdy Almaty-akshamy.kz
Qazaq, orys, nemis, grek, ózbek, sheshen, koreı, ýkraın, uıǵyr, evreı ertegileri men ańyzdaryna negizdelip salynǵan saıabaq kópultty Qazaqstan halqynyń birligin beıneleıdi.
Nysannyń ashylý baǵdarlamasynda balalar men eresekterge arnalǵan qyzyqty kvestter, túrli oıyn-saýyqtar qarastyrylǵan. Eriktiler balalarǵa Qazaqstan halyqtarynyń ertegilerin aıtyp beredi, al etnomádenı birlestikter shyǵarmashylyq nómirlerin kópshilik nazaryna usynady. Odan bólek, merekelik jármeńke ótedi, onda árkim jańa jyldyq syılyqtar men kádesyılar satyp ala alady.
Ertegiler saıabaǵynyń jalpy aýdany 3000 sharshy metrdi quraıdy. Munda naǵyz mádenıet jáne demalys baǵy bar. Qylqandy jáne japyraqty aǵashtar oazısi, gúldengen butalar, raýshan kóshetteri, gúlzarlar jáne "altyn balyqtary" bar toǵanda sýburqaq ornalasqan.
Demalys ornynda shyrsha, qaraǵaı, týıa, maıqaraǵaı, jóke aǵashy, bórtegúl, sondaı-aq munda 150 jyldan astam ýaqyt buryn otyrǵyzylǵan emender bar. Butalardan: gortenzıa, kópirshik butasy, forzısıa, kóriktal, tobylǵy, arsha, qyryqqulaq. Aǵashtardyń saıasynda jaıaý júrginshiler joldary men oryndyqtar ornatylǵan.
Saıabaqta Qazaqstan aýmaǵynda turatyn halyqtardyń ertegileri men ańyzdary keıipkerleriniń músindik fıgýralary ornatylǵan. Atap aıtqanda, "Aldar Kóse", "Kúnekeı qyz", "Qojanasyr", "Chın Tımýr", "Masha men aıý", "Hasan men Ahmed", "Perseı", "Qoıan men tasbaqa", "Altyn balyq", "Pasúk", "Genzel ı Gretel" jáne "Teve sút satýshy". Jalpy, qoladan quıylǵan on úsh avtorlyq músin qoıylǵan.
Olardyń ishinde "Santa Klaýs taǵy" dep atalatyn erekshe músindik kompozısıa bar. Munda Santamen estelik fotoǵa túsýge bolady.
Saıabaq músinderiniń avtory áıgili qazaqstandyq músinshi, stanokty, monýmentaldy, memorıaldyq jáne saıabaq músininiń eń tanymal sheberleriniń biri – Pavel Ivanovıch Shorohov.
Demalys ornynda ana men balaǵa arnalǵan jaıly jáne jabdyqtalǵan bólmeler jumys isteıdi. Sondaı-aq saıabaqta ystyq shaımen nemese kofemen jylynyp, osynda jańa pisirilgen nan ónimderinen dám tatýǵa bolady.
Ertegiler saıabaǵynyń jumys kestesi – kún saıyn saǵat 8.00-den 19.00–ge deıin. Senbi, jeksenbi jáne mereke kúnderi saǵat 10.00-den 16.00-ge deıin balalarǵa arnalǵan baǵdarlamalar ótkiziledi. Kirý tegin.
Saıabaq Almatynyń eń kóne pravoslavıe ǵıbadathanasy, mádenıet jáne sáýlet eskertkishi – Qazan soboryna irgeles aýmaqta ornalasqan. Kóp jyldar boıy bul qoqys shashylǵan bos jer edi. Endi bul ońtústik astana turǵyndary men qala qonaqtary úshin bezendirilgen demalys orny bolmaq.