Táýelsizdik merekesi qarsańynda Almatynyń bıylǵy jylǵy egizderi men esimderin saralap kórdik.
Jaqynda ǵana Qazaqstan halqy 20 mıllıonynshy turǵynyn qarsy aldy. Baqytty sátke Qazaqstannyń ár óńirinen sol saǵat, sol mınýtta dúnıege kelgen sábıler ilikti. Dál sol sátte týylǵan almatylyqtar bolmasa da, elimizdiń demografıasynyń ósýine aıtarlyqtaı úles qosqan analarymyzdyń Almatyda da kóp ekenine kózimiz jetti. Jyl basynan beri búginge deıin Almatyda dúnıege kelgen tek qana egizderdiń ózi 217 jupty quraıdy eken. Arasynda úshemder de bar, dep habarlaıdy almaty-akshamy.kz.
«Azamattarǵa arnalǵan úkimet» memlekettik korporasıasy Almaty qalasy fılıaly aýdandyq AHAJ bólimderiniń bergen málimetinshe, bıylǵy jyly egizderdiń kóshin 39 egizben Bostandyq aýdany, 38 egizben Túrksib jáne 31 egizben Alataý aýdany bastap tur. Odan keıin tizimdi 31 egizben – Alataý, 30 egizben Medeý aýdany, 29 egizben Almaly aýdany jalǵastyrǵan. Tizimniń sońyn 28 egizben Áýezov, 13 egizben Jetisý, 8 egiz 1 úshemmen Naýryzbaı aýdany aıaqtap tur.
«Bul óte qýanarlyq jaǵdaı. Elimizde halyq sanynyń ósip jatqany – jaqsy qubylys. Talaı náýbetti basynan ótkerip, ósý qarqyny báseńsip qalǵan halqymyz, bıyl 20 mıllıondyq mejege jetip qýantyp otyr. Elimizde halyqtyń áleýmettik jaǵdaıyna asa mán berilip, analardyń da alańsyz balaly bolýyna jaǵdaılar qarastyrylyp jatyr.Bosanǵanǵa deıingi, bosanǵannan keıingi járdemaqylary ósti. Árbir bala týylǵanda beriletin járdemaqylar da jyl saıyn ósip otyr. Kórsetiletin memlekettik qyzmetter proaktıvti jáne kompozıtti nusqalarǵa kóshirildi. Analar kóp qyzmetterdi HQO-ǵa kelmeı-aq onlaın alatyn boldy», - deıdi «Azamattarǵa arnalǵan úkimet» memlekettik korporasıasy Almaty qalasy fılıaly dırektorynyń orynbasary Farıda Bokıjanova.
Aıta ketý kerek, sońǵy jyldary elimizde egiz jigitter men egiz qyzdardyń qosylý jaıttary da jıilep keledi. Bul jaman úrdis emes, álbette. Aqtóbe, Mańǵystaý oblystarynda egiz jigitter egiz qyzdarǵa úılengen jaıttar bar. Tipti, Ońtústik Qazaqstan oblysynda 32 jyl buryn egiz qyzdarǵa úılengen egiz baýyrlar turady eken. Olardyń qaı-qaısysy da ómirlerine rıza.
Álemde 80 myńǵa jýyq egiz bar kórinedi. Resmı málimet boıynsha jyl saıyn álemde 1,6 mıllıon egiz týady eken. Qazaqstan egizderdi ómirge alyp kelýi jóninen álemde 48 orynda eken. Degenmen, Qazaqstannyń árbir qalalary men aýyldary jaqsy kórsetkish kórsetip jatsa, 48-orynnan jyljýymyz da ǵajap emes.
Sondaı-aq, Almatynyń sábıleri ıemdengen esimdermen de bólissek. «Azamattarǵa arnalǵan úkimet» memlekettik korporasıasy AHAT bólimderiniń bergen málimetinshe, almatylyqtardyń kópshiligi balalaryna qasıetti Islamdaǵy esimderdi tańdapty. Olardyń qatarynda Muhammed, Al-Muhammed, Islam, Muhammedálı, Omar, Abdrahman, Fatıma, Raıana, Káýsar, Aısha, Medına, Iasına bolsa, kóp kezdesetin esimder qatarynda tarıhı tulǵalar men qaıratkerler esimderi de bar. Máselen, Abylaıhan, Qazbek, Ábilhaıyr, Kenesary, Álıhan, Ámire, Nursultan, Qasym-Jomart, Han, Aıǵanym, Bórte, Zere, Tomırıs jáne t.b. Sonymen qatar, Aldıar, Aısultan, Alınur, Nuralı, Alıar, Aıon, Aılın, İnjý , Marjan, Asylym, Marám, Sofıa, Aıala syndy qazirgi zamanǵy esimderdi de birqatar ata-analar tańdaǵan.
«Áıel adam úshin ana bolýdan asqan baqyt joq shyǵar. Balalardyń dúnıege kelýi teńdesi joq qýanysh ákeledi jáne olarmen baılanysty barlyq qıyndyqtar birtindep umytylady. Onyń ústine bir emes, egiz sábı dúnıege kelip jatsa, óziń jáne týǵan-týystar úshin de qýanysh eselene túsedi eken», - deıdi jaı ǵana ana baqytymen bólisken Dınara Abdýkarımova.
Osy jyldyń qańtar-qazan aralyǵynda Almaty qalasynda 29 560 bala dúnıege keldi. Onyń 15 251 - ul, 14 309 - qyz. Olardyń 435 bala egiz týylǵan - 216 juby egiz, 1-i úshem. Almaty úshin tamyz aıy nárestelerdiń kóp týylýymen erekshelendi. Bul aıda 3310 bala ómir esigin ashqan.