Qaladan shyǵatyn negizgi joldarǵa beınebaqylaý kameralary ornatylady.
Budan bylaı Almatyda jol erejesin buzǵan taksı júrgizýshileri «Sergek» kameralary arqyly anyqtalmaq, dep habarlaıdy Almaty-akshamy.kz
Almaty qalalyq PD Ákimshilik polısıa basqarmasy jol qozǵalysy qaýipsizdigin qamtamasyz etý salasyndaǵy baqylaý organy retinde qaladan shyǵý joldaryndaǵy kólik qozǵalysy jaǵdaıynyń shıelenisýine alańdaýshylyq bildiredi.
«Keıbir azamattar taksı qyzmetin kórsetetin, ótip bara jatqan kólikterdi toqtatý maqsatynda jol boıynda qol sozyp, óz áreketterimen kólik keptelisi men tótenshe jaǵdaılardyń týyndaýyna ákep soqtyrady. Sol arqyly ózderiniń ǵana emes, basqa da jol qozǵalysyna qatysýshylardyń ómiri men densaýlyǵyna qaýip tóndiredi. Joǵaryda aıtylǵandardy negizge ala otyryp, biz «Sergek» kameralaryn qaladan shyǵatyn negizgi joldarǵa eksperımentaldy túrde ornatýdy usyndyq: Tóle bı dańǵyly – Momyshuly kóshesi, Raıymbek dańǵyly – Momyshuly kóshesi, Raıymbek dańǵyly – Áshimov kóshesi», – dedi Almaty qalalyq polısıa departamenti Ákimshilik polısıa basqarmasynyń bastyǵy Nurlan Amanbek.
Sonymen qatar Almaty qalasynyń polıseıleri jol qozǵalysyna qatysýshylardyń barlyǵyna (júrgizýshilerge de, jaıaý júrginshilerge de) Qazaqstan Respýblıkasynyń Jol qozǵalysy erejeleriniń talaptaryn saqtaý qajettigin eskertti.