Almaty qalasynda stýdentter arasynda «Qazaq kúresi» boıynsha týrnır ótti.
Bul shara Qazaqstannyń patrıoty, jeltoksan oqıǵasyna qatysýshy Erbol Sypataevtyń 60 jyldyǵyna arnaldy. Sporttyq shara «SSKA» sport kesheninde uıymdastyrylyp, oǵan qaladaǵy 20-dan astam oqý ornynyń stýdentteri qatysty, dep habarlaıdy aqshamnews.kz
Týrnırdiń uıymdastyrýshylarynyń aıtýynsha, bul is-shara Qazaqstannyń ulttyq dástúrlerin saqtap, mádenı murasyn dáripteýge úlken yqpal etpek.
«Qazaq kúresi» týrnıri tek sporttyq jarys qana emes, ol Erbol Sypataev syndy ult maqtanyshy bolǵan tulǵanyń erligi men patrıotızmin jastarǵa úlgi etý maqsatyn da kózdeıdi. Mundaı is-sharalar jastardyń boıynda ulttyq rýhty qalyptastyryp, olardyń boıynda patrıottyq sezimdi nyǵaıtýǵa zor yqpal etedi, — dedi halyqaralyq qoǵamdyq «Janashyr» qorynyń basshysy Janyl Apetova.
Týrnır barysynda qatysýshylar kúsh synasyp, óz sheberlikterin kórsetip, qazaq kúresiniń dástúrin saqtaýǵa jáne ony damytýǵa úlken úles qosty. Barlyǵy 200-den astam stýdent jarysqa qatysyp, 3 salmaq dárejesinde úzdikter anyqtaldy. Árbir jekpe-jek óte tartysty ótti, al kórermender qyzyǵýshylyqpen ártúrli shaıqastardy tamashalady. Jarysqa qatysýshylar ózderiniń fızıkalyq múmkindikteri men kúsh-jigerin synap, jeńiske degen umtylystaryn kórsetti.
Jarys nátıjesinde jeńimpazdar arnaıy medaldarmen jáne estelik syılyqtarmen marapattaldy. Al, júldegerler qataryna kirmegen, biraq jarysqa belsene qatysqan barlyq qatysýshylarǵa alǵys hattar men kishkentaı syılyqtar tabys etildi.
Týrnırdiń qurmetti qonaqtary retinde Erbol Sypataevtyń synyptastary, aýyldastary, jaqyndary men sońǵy ýaqyttarynda birge bolǵan dostary qatysty. Sondaı-aq, jeltoqsanshylar uıymynyń jetekshileri de sharaǵa qatysyp, Erbol Sypataevtyń esimin máńgilikke ulyqtaý maqsatynda sóz sóıledi.
Bul mańyzdy sharany uıymdastyrýshy — halyqaralyq qoǵamdyq «Janashyr» qory Almaty qalasynyń Qoǵamdyq damý basqarmasynyń qoldaýymen ótkizdi.