Almaty qalasynda «Taza Qazaqstan» respýblıkalyq ekologıalyq aksıasy aıasynda Bostandyq aýdanynda senbilik uıymdastyryldy. Sharaǵa qala turǵyndarynan bólek, depýtattar, Olımpıada júldegerleri, estrada juldyzdary, belsendi jastar jáne aýdandyq ákimdik ókilderi qatysty, dep habarlaıdy aqshamnews.kz
Senbilikke qatysýshylarǵa qolǵap, qoqys paketteri, kúrekter men sypyrtqylar taratylyp, bári birlese qala aýmaǵyn tazartý jumystaryn júrgizdi.
Almaty qalasynyń Bostandyq aýdanynyń ákimi Sanjar Alın de qatysyp, kóshe men alańdy birge tazalady. Ákim osy shara týraly bylaı dedi:
— «Taza Qazaqstan» aksıasy aıasynda qala turǵyndaryna tazalyqtyń mańyzdylyǵyn túsindirý úshin osyndaı senbilikter ótkizýdemiz. Bizdiń aýdanymyzda qazir 5 merdiger uıym jumys istep jatyr, biraq keıbir jaǵdaılarda qyzmet kórsetý sapasy syn kótermeıdi. Biz barlyq máseleler boıynsha turaqty baqylaý júrgizemiz, qajet bolsa, qatań sharalar qabyldaımyz. Búgingi senbilik — bárimiz úshin jaqsy múmkindik, tabıǵatty qorǵaýǵa birlesip úles qosýymyz qajet, — dep atap ótti ol.
Sharaǵa qatysqan depýtat Islam Baıramýkov tazalyqtyń ár adamǵa mańyzdy ekendigin, Almatynyń tazalyǵyn saqtaý úshin jastar men qala turǵyndarynyń birigip áreket etý kerektigin aıtty:
— Almatynyń tazalyǵy men ekologıasy árqaısymyzǵa baılanysty. Osy is-sharany qoldaý arqyly biz jastardy osy baǵytta tárbıelep, keleshekte barsha turǵyndardyń jaýapkershiligin arttyra alamyz, — dedi depýtat.
Tazalyqqa arnalǵan sharaǵa tanymal qazaqstandyq estrada juldyzdary da kelip, qoǵamdyq aksıaǵa qoldaý kórsetti. Qazaqstandyq ánshi Oktem Altaev qala turǵyndaryn tazalyqty saqtaýǵa jáne bul aksıaǵa qosylýǵa shaqyrdy:
— «Taza Qazaqstan» aksıasy aıasynda biz de bul jerdi tazalap júrmiz. Biraq, ókinishke oraı, munda tazalyqty saqtaý qıyn bolyp tur. Máselen, qalanyń ortalyǵy bola tura, adamdar áli de qoqys tastaıdy. Bul óte ókinishti. Barsha almatylyqtardy tazalyqqa beıjaı qaramaýǵa shaqyramyn, — dedi ánshi.
Sonymen qatar, Parıj-2024 Olımpıadasynyń qola júldegerleri Islam Satpaev pen Aleksandra Lı de aksıaǵa qatysyp, tazalyqtyń mańyzdylyǵyna toqtaldy. Islam Satpaev óziniń pikirinde:
— Bizdiń mindetimiz — qalamyzdy taza ustaý. Osy sharaǵa qatysa otyryp, biz tek ózimizdi ǵana emes, barlyq qala turǵyndaryn da ekologıalyq mádenıetti bolýǵa shaqyramyz. Tazalyq ár adamnyń qolynda, — dedi ol.
Aleksandra Lı óz kezeginde:
— Bul is-shara biz úshin óte mańyzdy. Tazalyq — bizdiń ortaq jaýapkershiligimiz. Árkim óz úıiniń mańaıyn taza ustaýy qajet. Osyndaı aksıalar arqyly biz qorshaǵan ortaǵa degen qurmetimizdi kórsetemiz, — dep sózin qorytyndylady.
Jastar men ekologıalyq qozǵalys belsendileri de bul sharada belsendilik tanytty. «Eko-reındjerler» qozǵalysynyń ókilderi Beıbıt Jasulanulynyń aıtýynsha, qalada jyl basynan beri 200-den astam ekologıalyq aksıa ótkizilgen. Olar qoqys jınaýdan bastap, ekologıalyq leksıalar men resýrstardy qaıta óńdeýge deıin ártúrli is-sharalardy uıymdastyrady.
Bul shara Almatynyń taza ári jasyl qalasyn saqtap qalýǵa úles qosýǵa shaqyrǵan barlyq qala turǵyndary úshin úlken múmkindik boldy. «Taza Qazaqstan» aksıasy eldiń ár óńirinde ótip, turǵyndardyń ekologıalyq mádenıetin arttyrýǵa baǵyttalǵan.