Almatyda QR Qarýly Kúshteri Bas áskerı-medısınalyq basqarmasynyń uıymdastyrýymen áskerı dárigerler men medısınalyq qyzmetkerlerdiń qatysýymen mańyzdy is-shara ótti. Jıynǵa Almaty óńirlik garnızonynyń áskerı bólimderi, Qarýly kúshterdiń túrleri men ásker tekteri medısınalyq qyzmetteriniń basshylary qatysty, dep habarlaıdy aqshamnews.kz
İs-shara Qorǵanys mınıstrligi áskerı klınıkalyq gospıtaliniń bazasynda uıymdastyryldy. Tájirıbelik sabaqtar 61993 áskerı bólimi men Qurlyq áskerleri áskerı ınstıtýtynyń nysandarynda ótkizildi. Bul is-shara áskerı medısınalyq qyzmettiń sapasyn arttyrý, jańa ádis-tásilderdi úıretý jáne áskerı salada densaýlyq saqtaý júıesin jetildirý maqsatynda mańyzdy ról atqardy.
Jıyn barysynda dári-dármekter men medısınalyq jabdyqtaýlardy josparlaý jáne satyp alý máseleleri talqylandy. Sondaı-aq, emdeý-aldyn alý sharalaryn uıymdastyrý jáne medısınalyq jabdyqtyń tıimdi paıdalaný jaı-kúıi týraly laýazymdy tulǵalar baıandama jasady. Áskerı dárigerler ambýlatorıalyq jáne stasıonarlyq pasıenttermen jumys isteý, jaraqat alǵan naýqastardyń esepke alý qujattamasyn júrgizý máselelerin pysyqtady. Sonymen qatar, áskerı qyzmetshilerdiń, onyń ishinde táýliktik narádqa túsýshilerdiń profılaktıkalyq medısınalyq tekserýden ótkizý standarttary da qarastyryldy.
Tájirıbelik sabaqtarda dárilik zattardy saqtaý, esepke alý jáne esepten shyǵarý tártipteri de egjeı-tegjeıli talqylandy. Jıynǵa qatysýshylar dene shynyqtyrý daıyndyǵynan synaq tapsyryp, arnaıy daıyndyq boıynsha normatıvterdi oryndady. Bul is-shara áskerı medısınalyq qyzmettiń sapasyn jaqsartýǵa, áskerı qyzmetshilerdiń densaýlyǵyn qorǵaýǵa jáne jalpy áskerdiń jaýyngerlik daıyndyǵyn nyǵaıtýǵa mańyzdy úles qosty.