Almaty qalasynda epıdemıologıalyq jaǵdaı turaqty. Óńirlik komýnıkasıalar qyzmetinde ótken brıfıńte Almaty qalasy Sanıtarlyq-epıdemıologıalyq baqylaý departamenti basshysynyń orynbasary Asel Kalykova 2025 jyldyń tórtinshi aptasynda qalada JRVI-diń 17 578 jaǵdaıy tirkelgenin habarlady. Bul kórsetkish ótken jyldyń osy kezeńimen salystyrǵanda 1,7 esege tómen, alaıda aldyńǵy aptamen salystyrǵanda 2,7%-ǵa joǵary.
Mamandardyń aıtýynsha, ınfeksıalardyń órshýi negizinen balalar arasynda baıqalady, biraq aýrý deńgeıi baqylaýdyń sheginen aspaıdy.
Epıdemıologıalyq maýsym bastalǵaly (2024 jyldyń 1 qazanynan bastap) 297 756 JRVI jaǵdaıy tirkeldi, olardyń 62,7%-yn balalar quraıdy. Zerthanalyq zertteýlerdiń nátıjesinde qalada tumaý vırýstarymen qatar, rınovırýs, bokavırýs, adenovırýs jáne basqa da JRVI qozdyrǵyshtary júrip jatqany anyqtaldy.
Qala aýmaǵynda segiz qadaǵalaý ortalyǵy jumys isteıdi, onyń tórteýi emhanalarda, qalǵan tórteýi stasıonarlarda ornalasqan. Bul ortalyqtarda jedel respıratorlyq ınfeksıalarǵa turaqty baqylaý júrgizilýde.
Sanıtarlyq-epıdemıologıalyq qyzmet mamandary syrqattanýshylyqtyń ósý kezeńinde aldyn alý sharalaryn saqtaý qajettigin eske salady: adam kóp jınalatyn oryndardan aýlaq bolý, maska taǵý, ımýnıtetti nyǵaıtý jáne aýrý belgileri paıda bolǵan jaǵdaıda ýaqytyly dárigerge qaralý.