Dárigerdiń bastamasymen alǵash ret Adam reprodýksıasy ortalyǵy ashyldy
Almatyda elimizge belgili dáriger, bilikti basshy, QR Densaýlyq saqtaý ardageri, «Belsendi uzaq ómir» qoǵamdyq qorynyń prezıdenti Gúlshara Ǵazızqyzy Ýrmýrzınanyń 80 jyldyq mereıtoıy atalyp ótti, dep habarlaıdy Almaty-akshamy.kz.
İs-sharany «QDSJM» Qazaqstandyq medısınalyq ýnıversıtetiniń rektory Ardaq Áýezova saltanatty túrde ashyp, mereıtoı ıesin Qoǵamdyq densaýlyq saqtaýdy damytýǵa qosqan zor úlesi úshin jyly lebizin bildirdi. Sondaı-aq ol Ǵylymı keńes bergen Ýnıversıtettiń «Qurmetti profesory» ataǵyn jáne Qazaqstan Respýblıkasynyń Densaýlyq saqtaý mınıstri A. V. Soıdyń atynan quttyqtaý hatyn tabys etti. Onda mereıtoı ıesiniń eńbek qyzmetin dál sıpattaıtyn mynadaı joldar bar: «Qurmetti Gúlshara Ǵazızqyzy! Sizdiń eńbek jolyńyz erekshe. Ýchaskelik dáriger-pedıatrdan bastap, elimizdiń jáne Almaty qalasynyń qoǵamdyq-saıası ómirine belsendi qatystyp, túrli deńgeıdegi basshylyq qyzmetin atqardyńyz. Siz-Qazaqstannyń medısınalyq qoǵamdastyǵynyń tanymal kóshbasshysysyz...».
Gúlshara Ǵazızqyzy sanaly ǵumyryn densaýlyq saqtaý salasyna arnaǵan jan. Onyń tikeleı bastamasymen qurylǵan medısınalyq ortalyqtar búginde halyq ıgiligine qyzmet etip keledi. Gúlshara Ǵazızqyzynyń basshylyǵymen Almatyda alǵash ret somatıkalyq balalar sanatorııleri, aralas emhanalar, meıirbıke kútimi aýrýhanasy, perınataldyq ortalyq, Adam reprodýksıasy ortalyǵy ashyldy.
İs-shara barysynda «Áleýmettik medısınalyq saqtandyrý qory» KEAQ Almaty qalasy boıynsha fılıalynyń basshysy Tileýhan Shildebaıuly Ábildaev quttyqtaý sóz sóılep, «Áleýmettik medısınalyq saqtandyrý qory» KEAQ Basqarma tóraǵasynyń quttyqtaý hatyn jáne «Eńbek qaıratkeri» medalin tabys etti.
Saltanatty sharaǵa Almaty qalasy ákimdiginiń, Almaty qalasy Qoǵamdyq densaýlyq basqarmasynyń ókilderi, áriptesteri men zamandastary, shákirtteri qatysty: Ahmetov V.I., Sýltangazıeva S.E., Erjanov K.D., Kýrakbaev K.K., Madeeva J.A. jáne basqalary.
Merekelik shara jalǵasynda Gúlshara Ǵazızqyzy aýdıtorıa aldynda «Kóshbasshylyq» taqyrybynda aktilik dáris oqydy, ol onyń ómiri men eńbek qyzmetine arnaldy. Sońynda Gúlshara Ǵazızqyzy is – sharany uıymdastyrýshylarǵa - «QDSJM» QMÝ, Almaty klınıkasynyń qaýymdastyǵyna jáne «Qazaqstandyq medısınalyq keńes» qaýymdastyǵyna umytylmas tamasha kesh úshin úlken alǵysyn bildirdi.
Ýrmýrzına Gýlshara Gazızqyzy 1966 jyly Almaty memlekettik medısına ınstıtýtyn bitirgen. Pedıatrıa boıynsha klınıkalyq ordınatýrany aıaqtaǵannan keıin Almaty Memlekettik Dárigerler Bilimin Jetildirý Instıtýtynda ordınator dáriger, № 2 qalalyq balalar klınıkalyq aýrýhanasynyń bólim meńgerýshisi, № 3 qalalyq balalar klınıkalyq aýrýhanasynyń bas dárigeriniń orynbasary bolyp jumys istedi. 1978 jyldan bastap Almaty qalalyq densaýlyq saqtaý basqarmasy bólim meńgerýshisiniń orynbasary qyzmetin atqarady. 1985 jyly № 1 qalalyq balalar klınıkalyq aýrýhanasynyń bas dárigeri bolyp taǵaıyndaldy. QazKSR Qyzyl Kres jáne Qyzyl Jarty Aı qoǵamyn basqardy. 1987 jyldan bastap QazKSR Densaýlyq saqtaý mınıstriniń orynbasary bolyp jumys istedi. 1991 jyly Almaty q. Densaýlyq saqtaý basqarmasynyń bastyǵy laýazymyna taǵaıyndaldy. 1995 jyly Almaty q. Mindetti medısınalyq saqtandyrý qoryn basqardy. 1999 jyly Qazaqstanda alǵash ret «Hospıs» memlekettik qaıyrymdylyq mekemesin qurdy jáne birneshe jyldar boıy basqardy.
Densaýlyqty qorǵaý jáne nyǵaıtý isine ólsheýsiz úles qosqany úshin nagradalardyń, medaldar men alǵys hattardyń ıegeri. Qazirgi ýaqytta «Belsendi uzaq ómir» qoǵamdyq qoryn basqarady. QR Densaýlyq saqtaý mınıstrliginiń «QR Densaýlyq saqtaý úzdigi» (1992j.) jáne «Densaýlyq saqtaý isine qosqan úlesi úshin» (2011j.) vedimistik tós belgilerimen marapattalǵan.