Almatyda jóndeýden ótken Jandosov jáne Turǵyt Ózal kóshelerinde qozǵalys ashyldy
Almatyda qala kósheleri men joldardy ortasha jóndeý jumystary jalǵasyp keledi. Qazir 95 kóshe jóndelip, taǵy 100-den astam kóshege jumystar júrgizilýde. Bıyl 250 shaqyrym bolatyn 274 kóshe ortasha jóndeýden ótti. Osylaısha, jaqsy jáne qanaǵattanarlyq jaǵdaıdaǵy joldyń úlesin 92%-ǵa deıin jetkizý josparlanǵan.
Mysaly, ótken demalys kúnderi úsh magıstraldy kósheniń bir bóligi merziminde jóndelip, kólik qozǵalysy tolyq ashyldy.
Bul Rysqulov kóshesimen qıylysatyn jolaıyryqtan Halıýllın kóshesimen qıylysatyn jolaıyryqqa deıingi Qulja tas jolynyń bóligi. Taǵy bir kóshe – Raıymbek dańǵylynan Tóle bı kóshesine deıingi Turǵyt Ózal kóshesiniń bóligi. Sondaı-aq, Jandosov kóshesiniń Iassaýı kóshesinen Saın kóshesine deıingi ýchaskesine jóndeý jumystary júrgizildi.
Aıta ketý kerek, 20 magıstraldy kósheniń jóndeý jumystarynda jol tóseminiń beriktigin arttyrýǵa baǵyttalǵan polımerasfaltbeton qoldanyldy. Jol tańbalary materıaldaryn óndirýshi zaýyttyń talabyna sáıkes, jóndelgen ýchaskelerge jol tańbasy 15-20 kúnnen keıin syzylady.
Esterińizge sala keteıik, qozǵalysty shekteýge qatysty barlyq aqparat Almaty.kz saıtynda, @AlmatyJoly Telegram arnasynda, aýdandyq ákimdikter men basqarmalardyń áleýmettik jelilerinde, sondaı-aq 2GIS pen «Iandeks kartalar» servısterinde jazylǵan.