Parıj prokýratýrasy Pavel Dýrovtyń qamaýǵa alynýyna qatysty alǵash ret resmı málimdeme jasady.
Jarıa etilgen qujatta kásipkerdiń "esimi atalmaǵan tulǵaǵa" qarsy qozǵalǵan qylmystyq is aıasynda tutqyndalǵanyn aıtady.
Bul is boıynsha Telegram basshysy 12 túrli qylmysqa qatysty kúdikke ilingen, dep habarlaıdy aqshamnews.kz.
24.kz-tiń habaraýynsha, solardyń ishinde aqsha jymqyrý, lısenzıasyz krıptovalútalyq qyzmet kórsetý, kıberqylmysqa qatysý, tergeýge qajetti aqparat berýden bas tartý bar. "Esimi atalmaǵan tulǵaǵa" qarsy is osydan bir jarym aı buryn qozǵalǵan eken.
Esterińizge sala keteıik, Telegram áleýmettik jelisiniń negizin qalaýshy Pavel Dýrov 24 tamyzda Parıjdiń Le Býrje áýejaıyna jeke ushaǵymen qonǵan sátte qamaýǵa alynǵan edi.
Janynda bolǵan oqqaǵary men kómekshisi jaýap alýdan keıin bosatylǵan. Dýrovtyń ózinen de jaýap alynǵan. Endi jergilikti zań boıynsha ol 28 tamyzǵa deıin qamaýda bolýy kerek. Osydan keıin álemde "bul oqıǵa sóz bostandyǵyn shekteý" degen túrli málimdemeler jasalýda.