Almatydaǵy jetinshi aýrýhana dárigerleri omyrtqasy qatty zaqymdanǵan naýqastardy shaǵyn ınvazıvti tásildermen emdep jatyr
Búginde «omyrtqa jaryǵy», «moıyn stenozy», «bel omyrtqa stenozy», «omyrtqanyń jyljýy» syndy dıagnozdardy bilmeıtin adam kemde-kem. Mundaı aýrýǵa shaldyqqan naýqastar dári-dármek kómektespegen jaǵdaıda hırýrgıalyq operasıaǵa júginýge májbúr bolady. Kez-kelgen ota saldary ońaı bolmaıtyny belgili, sondyqtan dárigerler emniń pasıent densaýlyǵy úshin tıimdi tásilin tańdap alýǵa tyrysady.
Ońtústik astanadaǵy №7 Qalalyq klınıkalyq aýrýhanada ótken sheberlik klasy barysynda moıyn stenozy, bel omyrtqa kanalynyń tarylýy syndy dertke shaldyqqan pasıentterge shaǵyn ınvazıvti otalar jasaldy. Oǵan Astanadaǵy Ulttyq neırohırýrgıa ortalyǵy men Almatydaǵy kópbeıindi aýrýhanalardyń neırohırýrgteri qatysty.
Eki kúndik sheberlik klasy barysynda asa aýyr klınıkalyq naýqastarǵa 3 ota jasaldy. Ota barysynda bir pasıenttiń moıyn omyrtqasyna lámınoplastıka jasaldy. Bel omyrtqasy zaqymdanǵan taǵy bir pasıentke shaǵyn ınvazıvti OLIF ádisimen operasıa jasaldy. Hırýrgıalyq manıpýlásıalardyń bári MÁMS esebinen júrgizildi.
Lámınoplastıka – omyrtqa qysylyp, júıke talshyqtarynyń zaqymdanýyna ákep soqtyrǵan stenoz aýrýyna jasalatyn neırohırýrgıalyq otanyń biri. Ol qysylǵan omyrtqa kanalyn bosatyp, otadan keıin bolatyn asqynýlardyń aldyn alýǵa kómektesedi.
Al, OLIF prosedýrasy ózge ota túrlerine qaraǵanda ómirlik mańyzy bar aǵza qurylymdaryn zaqymdanýdan saqtaıdy.
Mysaly, 52 jastaǵy naýqas 20 jyldan astam ýaqyttan beri omyrtqa jaryǵynyń aýyr túrimen aýyrady. Sońǵy birneshe aıdan beri aıaqtary jansyzdanyp, jaǵdaıy múlde nasharlaǵan, saldarynan kundelikti júrip-turýdyń ózi muń bolǵanyn aıtady. Dári-dármek pen fızıoterapıa eshqandaı nátıje bermegen soń hırýrg mamandardyń kómegine júginipti.
«Bul operasıa Ulttyq neırohırýrgıa ortalyǵynyń profesory Talǵat Kerimbaevtyń jetekshiligimen ótti. OLIF tásili tıimdi qoldanyldy. Bul bizdiń aýrýhanada joǵary bilikti mamandar jumys isteıtinin dáleldep berdi. Ota nátıjesinde naýqas erkin júrip-turý múmkindigine ıe boldy. Operasıa tinderdiń zaqymdanýyna jol bermeıdi, bul ásirese, uzaq ýaqyt boıy sozylmaly dertpen aýyratyn naýqastar úshin óte mańyzdy», - dedi jetinshi aýrýhananyń №1 Neırohırýrgıalyq bólimshesi meńgerýshisi Baqyt Aǵlaqov.
Mamannyń aıtýynsha, OLIF ádisiniń artyqshylyqtary kóp. Atap aıtqanda, shaǵyn ınvazıvti otadan keıin naýqas densaýlyǵy qysqa ýaqytta qalpyna keledi; otadan keıingi asqynýlar qaýpi tómendeıdi. Onyń ústine, pasıentterdiń kóbi ota ornynda qalatyn tyrtyqqa kóp mán beredi, sondyqtan shaǵyn ınvazıvti tásil kosmetıkalyq jaǵynan da tıimdi bolyp keledi.
«OLIF prosedýrasy hırýrgke deneniń aldyńǵy jáne qaptal tusynan jumys istep, belomyrtqa qyzmetin qalpyna keltirýge múmkindik beredi. Bul ádis naýqastarǵa dástúrli otaǵa qaraǵanda tez arada saýyǵyp, qalypty ómirge aralasýǵa múmkindik beredi. Eń bastysy, pasıent kóp qan joǵaltpaıdy jáne tin kóp zaqymdanbaıdy», - dep túsindirdi dáriger.
Sátti jasalǵan otanyń arqasynda syrqattyń nevrologıalyq ahýaly jaqsardy, aıaqtarynyń sezimtaldyǵy artyp, aýyrsyný belgileri tómendeı bastady. Operasıa omyrtqany turaqtandyryp, asqynýlardyń aldyn alýǵa múmkindik berdi. Naýqas otadan keıin ekinshi kúni óz betimen júre bastady.