Jańa joǵary oqý orny bıznes, ekonomıka jáne quqyq, AT, kreatıvti ındýstrıa salalarynda brıtandyq dıplomy bar mamandardy daıarlaıtyn bolady dep habarlaıdy almaty-akshamy.kz
De Montfort University Kazakhstan-nyń resmı ashylý saltanatyna QR Premer-Mınıstriniń orynbasary Eraly Toǵjanov, Almaty ákimi Baqytjan Saǵyntaev, QR Mádenıet jáne sport mınıstri Aqtoty Raıymqulova, QR Bilim jáne ǵylym vıse-mınıstri Sholpan Karınova, Ulybrıtanıanyń halyqaralyq saýda mınıstri Ranıl Djaıavarden, Ulybrıtanıanyń Qazaqstandaǵy elshisi Ketı Lıch qatysty.
QR Premer-Mınıstriniń orynbasary Eraly Toǵjanov quttyqtaý sózinde De Montfort University Kazakhstan elimizdegi ǵana emes, Ortalyq Azıadaǵy ozyq joǵary oqý oryndarynyń biri bolatynyna senim bildirdi.
«Ýnıversıtettiń negizgi artyqshylyqtarynyń biri – túlekterdiń básekege qabilettiligi. Bas joǵary oqý ornyn bitirgen jastardyń 97%-y oqý bitirgennen keıin jarty jyl ishinde jumys tabady jáne IBM, Microsoft, BMW sıaqty kompanıalarda jumys isteıdi», - dedi Eraly Toǵjanov.
Premer-Mınıstr orynbasarynyń aıtýynsha, JOO jyl saıyn jalpy qabyldaý sanynyń keminde 7% kóleminde Qazaqstan azamattaryna granttar men stıpendıalar bóledi degen ýaǵdalastyqqa qoljetkizilgen.
«Biz qazaqstandyq fılıaldyń túlekteri Anglıadaǵy kampýs túlekteri sıaqty básekege qabiletti bolady dep úmittenemiz», - dedi Eraly Toǵjanov.
Óz kezeginde Almaty ákimi B. Saǵyntaev Almaty qalasynyń kreatıvti ındýstrıalar saıasatyn júzege asyrýda ýnıversıtettiń erekshe ról atqaratynyn atap ótti.
«Biz úshin bul rasynda da óte mańyzdy. Qalanyń odan ári ósýi, eńbek ónimdiligi, ómir sapasy men bıznes múmkindikteri boıynsha álemniń 100 úzdik qalasynyń qataryna ený jónindegi maqsatymyzǵa jetý úshin bizge ekonomıkany dıversıfıkasıalaý boıynsha jumysty jalǵastyrý qajet»,-dedi qala ákimi.
Baqytjan Saǵyntaevtyń aıtýynsha, osy maqsatta qala ekonomıkasynda qurylymdyq manevr júrgizilýde. Bul – jańa ekonomıkalyq ósýdiń draıverlerine aınalatyn sıfrlandyrýdy, týrızmdi jáne kreatıvti ındýstrıalardy damytý.
JOO rektory Dj. Paýnder Almaty ákimi B. Saǵyntaevqa ýnıversıtettiń ashylýyna qoldaý kórsetkeni jáne jaǵdaı jasaǵany úshin alǵys aıtty. Bul Qazaqstanda oqýǵa lısenzıa alǵan jáne úzdik bilim berý standarttaryn engizý úshin qurylǵan alǵashqy sheteldik ýnıversıtet. Túlekterge Ulybrıtanıanyń DMU Lester Ýnıversıteti dárejesi beriletin bolady.
Bakalavrıatqa túsken alǵashqy 145 stýdent qabyldaýdan oıdaǵydaı ótti. «Býhgalterlik esep jáne qarjy», «Bıznes jáne marketıń», «Ekonomıka jáne halyqaralyq qatynastar», «Bıznes-quqyq», «Qarjy jáne ınvestısıalar» baǵyttary boıynsha bilim berý baǵdarlamalary qarastyrylǵan. Budan basqa, oqytý baǵdarlamasynda aqparatty tehnologıa, kreatıvti ındýstrıa mamandyqtary ıntegrasıalanatyn bolady. Al atalǵan baǵyttarǵa Almatynyń 2050 jylǵa deıingi Damý strategıasynda erekshe kóńil bólinedi.
«Dóńgelek ústel» barysynda qazaqstandyq jáne brıtandyq taraptar Qazaqstannyń kreatıvti ekonomıka sektoryn damytý jáne yntymaqtastyq múmkindikterin talqylady.