Órt aýmaǵy 80 paıyz azaıǵan
Qyzyl jalynnyń tutanýyna turǵyndardyń otty jónsiz qoldanýy sebep bolady. Shildeniń shilińgir ystyǵynda lap etý yqtımaldylyǵy joǵarlaıtyn dala órti bıyl 50 paıyzǵa azaıǵan. Bul týraly Almaty qalasynyń tótenshe jaǵdaılar departamenti málim etti, dep habarlaıdy, Almaty-akshamy.kz Almaty.tv-ge silteme jasap.
Tótenshelikter dereginshe, jyl basynan beri qýraǵan ósimdik basqan aýmaqtarda jalpy 77 ret órt bolǵan. Qyzyl jalyn shashamen 2,5 gektardan asatyn alańǵa tarapty. Alaıda tótenshelikter, ótken jylmen salystyrǵanda, bıyl dala órtiniń azaıǵanyn aıtyp otyr.
«Ótken jylmen salystyrǵanda órt oqıǵasy 50 paıyzǵa tómendedi. Sáıkesinshe, órt aýmaǵy 80 paıyz azaıǵan. Bul – aýdandyq ákimdiktermen birlese istegen sharalar nátıjesi», – dedi TJD aǵa ınjeneri Ábdiıslam Ábdiqadyrov.
Qyzyl jalynnyń tutaný faktisi alqaptan bólek, turǵyn úılerde de tómendegen deıdi tótenshelikter. Máselen, byltyrmen salystyrǵanda 16 paıyzǵa azaıǵan. Birinshi jartyjyldyqta 312 órt jaǵdaıy tirkelgen.
«TJD bıyl 110 shaqyrtý tústi. Onyń ishinde 27 órt oqıǵasy oryn alǵan. Ótken jylmen salystyrǵanda 18 paıyzǵa kem», – dedi Áýezov aýdandyq tjb bas mamany Raýan Dáýrenuly.
Al Almatynyń Áýezov aýdanynynyń órt sóndirýshileri kóbine turǵyn úılerge shaqyrtý túsetinin aıtady. Sondyqtan munda kólikten bólek, 54 metrge deıin kóteriletin kran jáne keptelis kezinde ýaqyt únemdeý úshin motosıklder de qoldanylady eken.
Órt sóndirýshiler dereginshe, qyzyl jalynnyń tutanýyna kóbine turǵyndardyń qoqys tastap ketýi, otty jónsiz qoldanýy sebep bolady. Buǵan deıin TJD ókilderi tabıǵat aıasynda jabdyqtalmaǵan jerde kýáp pisirip, as daıyndaǵandarǵa qomaqty aıyppul salynatynyn aıtqan.