Ulybrıtanıada tarıhtaǵy eń ystyq kún oryn aldy
Eýropa memleketterinde buryn-sońdy bolmaǵan aptap ystyq oryn alýda. BBC News málimeti boıynsha qart qurlyqta aýa temperatýrasy 40 gradýstan asyp ketti, dep habarlaıdy Almaty-akshamy.kz BAQ.KZ-ke silteme jasap.
Aýa raıynyń mundaı qatty ystyǵy saldarynan ormandar órtenip, jergilikti turǵyndar evakýasıalanyp, órt sóndirýshiler, dárigerler men qutqarýshylar demalyssyz jumys istep jatyr.
Ulybrıtanıada keshe tarıhtaǵy eń ystyq kún oryn alǵan. Bul jerde synap baǵanasy alǵash ret 40 gradýstan artyq ystyqty kórsetti. Adamdarǵa múmkindiginshe kóshege shyqpaý jáne kólik quraldaryn qoldanbaý eskertildi. London men onyń mańaıynda ystyqtan shópter órtengen.
Fransıada tilsiz jaý orman alqaptaryn joıyp, myńdaǵan adamdy evakýasıalaýǵa týra kelgen. Kórshi Shveısarıada qatty ystyqtan Lak-Brenet kóli qurǵap qaldy.
Germanıada da aýa temperatýrasy +40 gradýstan asyp ketti. Italıada sońǵy 70 jylda bolmaǵan qurǵaqshylyq pen orman órtteri oryn aldy. Birneshe óńirde tótenshe jaǵdaı jarıalandy.
Vengrıanyń ystyǵy áli basylar emes. Temperatýra bul elde de +40 gradýstan asty. Grekıada orman órti Afınaǵa jaqyndap keledi.
Portýgalıada orman órtinen 40 myń gektar jer órtenip ketken. Portýgalıada temperatýralyq rekord bıyl +47 gradýsty kórsetti.