Almatyda «AMANAT» partıasynyń AQF Áıelder qanaty men qalalyq Qoǵamdyq keńestiń uıymdastyrýymen dıalog alańy ótti. Sharanyń basty taqyryby – býllıng pen turmystyq zorlyq-zombylyqqa ushyraǵan balalarǵa kásibı psıhologıalyq kómek kórsetý máselesi, dep habarlaıdy aqshamnews.kz
Alataý jáne Naýryzbaı aýdandarynda ótken jıynǵa qoǵamnyń qaýipsizdigin qamtamasyz etý jáne balalarǵa qajetti qoldaý kórsetý maqsatynda mamandar, depýtattar, qoǵam qaıratkerleri qatysty. Moderator retinde Almaty qalasy máslıhatynyń depýtaty ári balalar quqyqtary jónindegi ýákil Dıana Erlan boldy. Ol mektepterde pedagog-psıhologtardyń jetispeýshiligin aıtyp, kelesi jyly 200 mamandy qosý josparlanǵanyn habarlady.
Psıhıkalyq saýyqtyrý ortalyǵynyń dırektory Sapar Quttybaıuly Rahmenshıev senim telefonyna túsetin qońyraýlardyń 18%-ynyń sýısıdaldy oılarǵa qatysty ekenin atap ótti. Bul derek kásibı psıhologıalyq kómektiń qajettiligin kórsetedi. Dıana Erlan balalar arasyndaǵy sýısıd jaǵdaılarynyń statısıkasyn bólisti:
- 2021 jyly – 13 aıaqtalǵan jaǵdaı, 33 áreket;
- 2022 jyly – 14 aıaqtalǵan jaǵdaı, 17 áreket;
- 2023 jyly – 9 aıaqtalǵan jaǵdaı, 35 áreket;
- 2024 jyldyń alǵashqy 9 aıynda – 13 aıaqtalǵan jaǵdaı, 37 áreket.
Óz-ózine qol jumsaý kórsetkishiniń ósýi barlyq múddeli taraptardyń úılesimdi jumys isteý qajettiligin kórsetedi. Kezdesý barysynda ata-analar men muǵalimderdiń balalardaǵy alańdaýshylyq belgilerin baıqaýdaǵy róline erekshe nazar aýdaryldy. Psıhıatr otbasylyq qundylyqtardyń, birlesip túski jáne keshki as ishý dástúrleriniń joǵalyp bara jatqanyn, sonyń áserinen eresekterdiń balalardaǵy alańdaýshylyq belgilerin baıqamaıtynyn aıtty. Ol balalardyń ómirdiń qıyndyqtaryn senimdi túrde jeńýi úshin qoldaý men maqtaý qajettigin atap ótti.
Sonymen qatar, mektep psıhologtaryna óz tájirıbelerinde kezdesetin qıyndyqtardy talqylaýǵa múmkindik berilip, olarǵa mańyzdy suraqtaryna jaýap alý múmkindigi usynyldy.
