QR Prezıdenti Qasym-Jomart Toqaevtyń QHR-ǵa memlekettik sapary barysynda Sıan qalasyndaǵy qazaq-qytaı ınvestısıalyq dóńgelek ústeli kezinde Orbis Manufacturing kompanıasy (Orbis Kazakhstan enshiles kásiporny) men EXEED International kompanıasy arasynda lısenzıalyq kelisimge qol qoıyldy.
Kelisim Orbis Manufacturing kompanıasyna Qazaqstan Respýblıkasynda qytaılyq EXEED premıaldy brendindegi avtokólikterdi shyǵarý quqyǵyn qarastyrady, dep habarlaıdy Almaty-akshamy.kz.
«Orbis Kazakhstan» kompanıalar tobynyń dırektorlar keńesiniń tóraǵasy Farrýh Mahmýdov pen EXEED International bas dırektory Chın Chao tehnologıalar týraly kelisimge qol qoıdy.
Almatynyń Indýstrıaldy aımaǵynda jańa zaýyt kesheni salynady. Óndiristik qýaty jylyna 80 myń kólik shyǵaratyn kásiporynnyń qurylysy 2023 jyly bastalady. Kásiporyn EXEED ozyq tehnologıalary men zamanaýı tehnologıalyq jabdyqtardyń paıdalana otyryp, Qytaı avtomobıl ónerkásibi kóshbasshylarynyń standarttary boıynsha salynady. Jobaǵa salynatyn ınvestısıalar 72 mlrd teńgeni quraıdy. Birinshi kezeńde zaýyt kesheni halyqty 1500 jańa jumys ornymen qamtamassyz etýge múmkindik beredi.
Orbis Kazakhstan dırektorlar keńesiniń tóraǵasy Farrýh Mahmýdovtyń málimdeýinshe, bul kelisim Orbis Kazakhstan kompanıalar tobynyń damýyndaǵy mańyzdy kezeń boldy.
«Biz úshin bul kompanıa qyzmetiniń jańa kezeńi, sonymen qatar EXEED International kompanıasymen uzaq merzimdi jáne ózara tıimdi yntymaqtastyqqa daıyn ekenimizdiń kórsetkishi. Eldegi tartymdy ınvestısıalyq bıznes-klımat, sondaı-aq jergilikti óndiristerge memlekettik qoldaý kórsetý jáne saladaǵy memlekettik saıasattyń turaqtylyǵy biz úshin mańyzdy faktor ekenin atap ótemin. Biz Qytaıdyń avtokólik ónerkásibi kóshbasshylarynyń standarttary boıynsha joǵary tehnologıalyq óndiriske ınvestısıa jasaımyz. Ol zamanaýı tehnologıalar transfertine, salyq tólemderiniń ósýine, sondaı-aq jalaqysy joǵary jumys oryndaryn qurýǵa yqpal etedi. Bizdiń joba Qazaqstan men Qytaı arasyndaǵy ekonomıkalyq baılanysty nyǵaıtýǵa, sondaı-aq Qazaqstannyń avtomobıl ónerkásibin damytýǵa septigin tıgizetinine senimdimiz», - dedi F.Mahmýdov.
Birinshi kezeńde qazaqstandyq kásiporyn EXEED markaly avtokólikterdiń úsh úlgisin shyǵarady, keıinnen brendtiń úlgiler jelisin keńeıtedi. Atap aıtqanda, tolyq gabarıtti VX jol talǵamaıtyn kóliginiń, TXL orta ólshemdi krosoveriniń jáne LX yqsham krosoveriniń shanaǵyn dánekerleý jáne boıaýmen birge tolyq sıkldi óndiris (CKD) iske qosylady.
Qazirgi tańda Orbis Kazakhstan-nyń enshiles kásiporny, Orbis Auto avtokólik toby Qazaqstanda EXEED dılerlik jelisin damytýda. Bul jeli arqyly shyǵarylǵan kólikterdi satý jolǵa qoıylady. 2025 jyly jańa kásiporynnyń konveıerinen Qazaqstanda jasalǵan tuńǵysh EXEED avtokóligi shyǵarylatyny aıtyldy.