Qazaqstan Respýblıkasynyń jańa Konstıtýsıasy jobasynda sheteldikterge jer satýǵa tyıym alynyp tastaldy degen aqparat shyndyqqa janaspaıdy, dep habarlaıdy Aqshamnews.kz.
Jalǵan aqparatqa qarsy is-qımyl ortalyǵy atalǵan málimettiń jalǵan ekenin málimdep, bul derek faktilerdi ádeıi burmalaý arqyly taratylyp jatqanyn atap ótti.
Ortalyqtyń túsindirýinshe, qoldanystaǵy Konstıtýsıanyń 6-babynyń 3-tarmaǵyndaǵy jer jáne tabıǵı resýrstarǵa qatysty norma jańa Konstıtýsıa jobasynda da esh ózgerissiz saqtalǵan. Atalǵan talaptardyń ózgermeıtini Konstıtýsıalyq reforma jónindegi komısıa tarapynan da rastalǵan.
Sonymen qatar jańa Konstıtýsıa jobasynda memlekettiń egemendigi, ýnıtarlyǵy men aýmaqtyq tutastyǵy konstıtýsıalyq qurylystyń negizderi retinde bastapqy taraýlarda naqty bekitilgen. Atap aıtqanda, 2026 jylǵy 30 qańtardaǵy jobaǵa sáıkes, Qazaqstan Respýblıkasynyń aýmaǵy bólinbeıdi jáne oǵan qol suǵylmaıdy, al memlekettiń basqarý úlgisi men tutastyǵy ózgermeıdi.
Osyǵan baılanysty ortalyq sheteldikterge jer satýǵa tyıym salý kúshin joıdy degen málimdemelerdiń quqyqtyq negizi joq ekenin atap ótti. Vedomstvo azamattar men buqaralyq aqparat quraldaryn aqparatty tek resmı derekkózderden tekserýge jáne manıpýlásıalyq málimetterdi taratpaýǵa shaqyrdy.