QR Sybaılas jemqorlyqqa qarsy is-qımyl agenttiginiń Almaty qalasy boıynsha departamentiniń basshysy Arman Rahımov Óńirlik komýnıkasıalar qyzmetiniń brıfıńinde sybaılas jemqorlyqtyń aldyn alý salasyndaǵy jumystyń negizgi nátıjeleri týraly aıtyp berdi, dep habarlaıdy aqshamnews.kz
2024 jyly Almatynyń sybaılas jemqorlyq táýekelderiniń kartasyn iske asyrý sheńberinde sybaılas jemqorlyqqa qarsy 4 monıtorıń jáne 5 syrtqy taldaý júrgizildi. Qorytyndysy boıynsha ekonomıka, qurylys jáne memlekettik múlikti basqarý sıaqty negizgi salalarda sybaılas jemqorlyq táýekelderin tómendetýge yqpal etetin 82 usynym ázirlendi.
Qabyldanǵan sharalardyń arqasynda 7 mlrd teńgeden astam somaǵa búdjet qarajatynyń tıimsiz jumsalýyn boldyrmaýǵa múmkindik týdy. «Almaty Arena» jáne «Halyq Arena» sport nysandaryn memlekettik basqarýǵa qaıtarý boıynsha is-sharalar ótkizildi, sondaı-aq áleýmettik mańyzy bar obektilerdiń qurylysy aıaqtaldy, onyń ishinde Bostandyq aýdanyndaǵy 135 oryndyq jańa balabaqsha bar.
Qalanyń seısmıkalyq qaýipsizdigin qamtamasyz etýge erekshe kóńil bólindi. Negizgi jetistikterdiń biri iOS jáne Android operasıalyq júıeleri bar qurylǵylarda sátti synalǵan «Mass Alert» jappaı erte eskertý júıesin engizý boldy. Júıe jer silkinisi kezinde ǵana emes, basqa tótenshe jaǵdaılarda, sonyń ishinde terorıstik qaýip kezinde de qoldanylady.
Tapsyrý merzimi oryndalmaǵan jáne jymqyrý qaýpi bar áleýmettik mańyzy bar obektilerdiń qurylysyna monıtorıń jalǵasýda. Áleýmettik mańyzy bar bes nysandy súıemeldeý jumystary júrgizilýde, olardyń úsheýi aǵymdaǵy jyldyń úshinshi jáne tórtinshi toqsandarynda aıaqtaldy, al ekeýi qurylys satysynda tur.
Atap aıtqanda, №21 gımnazıa aýmaǵynda ornalasqan 120 oryndyq balabaqsha paıdalanýǵa berildi. Onyń qurylysy 2018 jyly bastalyp, 2021 jyly aıaqtalady dep josparlanǵan. İske asyrylǵan aldyn alý sharalary men tehnıkalyq sheshimderdiń arqasynda jańa balabaqsha endi Bostandyq aýdanynan 135 balany qabyldaýǵa daıyn.
«Shaǵyn jáne orta bıznesti qoldaýǵa erekshe kóńil bólinedi. «Bızneske jol» jobasy aıasynda 685 kásipkerdiń quqyqtary qorǵaldy», - dedi A. Rahımov.
Sondaı-aq, qalada sybaılas jemqorlyqqa qarsy mádenıetti qalyptastyrý boıynsha belsendi jumys júrgizilýde. Bir jyl ishinde 270 myńnan astam adamdy qamtyǵan 533 is-shara ótkizildi.
Bıyl sybaılas jemqorlyqqa qatysty quqyq buzýshylyqtar týraly aqparat bergeni úshin 9 adam kótermelendi. Olardyń altaýy jalpy somasy 5,2 mln teńgege aqshalaı syıaqylarmen marapattaldy.
«Sybaılas jemqorlyq faktileri týraly habarlaǵan adamdardy kótermeleý júıesi qoǵamdyq senimdi nyǵaıtady jáne jyl saıyn kóbirek qoldaý alýda», - dep qorytyndylady spıker.