Kúzgi-qysqy kezeńde jedel respıratorlyq ınfeksıalardyń, sonyń ishinde pnevmonıanyń damý qaýpi artady. Pnevmonıa – barlyq jastaǵy adamdar zardap shegetin tynys alý joldarynyń eń qaýipti aýrýlarynyń biri. QR Densaýlyq saqtaý mınıstrliginiń málimetine sáıkes, 2024 jyldyń basynan 9 aı ishinde elimizde 76 myńnan astam jaǵdaı tirkelgen.
Pnevmonıa – ókpeniń tynys alý joldarynyń oshaqty zaqymdanýymen sıpattalatyn jedel ınfeksıalyq aýrý. Aýrý negizinen jótel, qaqyryq, álsizdik, entigý sımptomdarymen qatar, dene qyzýynyń joǵarylaýynan bastalady.
Almatydaǵy Kardıologıa jáne ishki aýrýlar ǴZI №2 terapıa bóliminiń pýlmonolog dárigeri Aıda Jádildiń aıtýynsha, pasıentterdiń keıbirinde, ásirese egde jastaǵy adamdarda pnevmonıaǵa tán shaǵymdar men fızıkalyq belgiler bolmaýy múmkin, ıntoksıkasıa sındromy basym bolady. Iaǵnı, pnevmonıanyń atıpti túri dene qyzýy kóterilmeı, qan kórsetkishterinde aıtarlyqtaı ózgeris bolmaı, ıntoksıkasıa saldarynan bas aýrýy, bulshyqet nemese tamaq aýyryp qurǵaq jótelmen qatar júrýi múmkin.
55 jastaǵy pasıentte tamaǵy jybyrlap, qurǵaq jótel paıda bolǵan. Naýqas muny salqyndaýmen baılanystyrady. 10 kún boıy ol ózin-ózi emdep, parasetamol, askorbın qyshqylyn qabyldaǵan, biraq ózdiginen qabyldaǵan emi áser etpegen. Jaǵdaıy kún saıyn nasharlap, jalpy jáne bulshyqet álsizdigi kúsheıe túsken. Aýrý bastalǵannan eki apta ótken soń naýqas stasıonarǵa tústi. Keýde qýysynyń kompúterlik tomografıasyn júrgizý kezinde eki jaqty tómengi úlesti pnevmonıa anyqtaldy. Zerthanalyq zertteýlerde leıkosıtterdiń shamaly joǵarylaýy, SOE jyldamdyǵy anyqtaldy. Keshendi emdeýden keıin naýqastyń jaǵdaıy jaqsardy.
«Eger ýaqytyly dıagnoz qoıyp, terapıany keshiktirmeı bastasa, pnevmonıa emdeledi. Pnevmonıa adamnyń densaýlyǵy men ómirine, ásirese osal sanattaǵy adamdarǵa áser etýi múmkin. Aldyn alý jáne ýaqytyly medısınalyq kómekke júginý asqynýlardyń aldyn alýǵa jáne ólim-jitim deńgeıin tómendetýge yqpal etedi. Alǵashqy belgiler paıda bolǵan kezde dereý dárigerge qaralyńyz, jaman ádetterden bas tartyńyz, tumaý men pnevmokokqa qarsy vaksınasıadan ótińiz. Dárýmenderge baı taǵamdardy tutynyńyz, fızıkalyq belsendilikpen aınalysyńyz jáne uıqyńyzdy qadaǵalańyz», – deıdi Kardıologıa jáne ishki aýrýlar ǴZI №2 terapıa bóliminiń pýlmonolog-dárigeri Aıda Jádil.