Almatydaǵy jalpyqalalyq senbilikte 15 myń tekshe metr qoqys jınalyp, 5 myń kóshet otyrǵyzyldy, dep habarlaıdy Almaty-akshamy.kz
Almatyda 22 sáýir kúni qala ákimdiginiń qoldaýymen qoǵamdyq uıymdar uıymdastyrǵan Almaty Clean & Green keń aýqymdy ekologıalyq aksıasy ótti. Qala ákimi Erbolat Dosaev eki jerdegi – Baým toǵaıy men Medeý aýdanyndaǵy ekoaksıaǵa qatysty. Shahar basshysynyń aıtýynsha, qorshaǵan ortany qorǵaý, tabıǵatty aıalaýǵa baǵyttalǵan mundaı aksıalar megapolıste jaqsy dástúrge aınalýǵa tıis.
Jalpyqalalyq senbilikke 82 myńnan astam adam qatysyp, 5 myń aǵash otyrǵyzylyp, 15 myń m3 astam qoqys jınaldy.
Ekologıalyq aksıany ambassadorlar, tanymal ártister biraýyzdan qoldady.
«Keremet, tamasha aksıa! Álemde ekologıa máselesi qanshalyqty ózekti ekenin bárimiz bilemiz, bul súıikti qalamyz Almatyǵa da qatysty. Bul óte mańyzdy oqıǵa, biz Almaty Clean & Green aksıasyn tal egýden bastaǵanymyzǵa qýanyshtymyn. Jas shybyqtyń jaıqalǵan aǵashqa aınalaryna senimimiz mol», - deıdi «Djýlıa» múzıkliniń ujymymen birge aksıaǵa qatysqan belgili mýzykant, A'Studio tobynyń prodúseri Baıǵalı Serkebaev.
«Senbilikke búgin turǵyndar, eriktiler, ártister qatysyp otyr. Biz jasyl jelekti aıalap ustaýymyz kerek. Menińshe, budan bizdiń qalamyz kórkeıedi. Senbi kúni ǵana emes, kúndelikti ómirde de osyny ustanýymyz kerek», - dedi aqyn Muratqan Shoqan.
Aıta keteıik, jalpyqalalyq senbilikti ótkizýge «Posadiderevo.kz» RQB, ECONETWORK, Qazaqstannyń kógaldandyrýshylar qaýymdastyǵy, «Sporttyq týrıser dostastyǵy» QU, «Greenup.kz» QQ muryndyq bolǵan. Qoǵamdyq uıymdar áleýmettik jelilerde aksıany zamanaýı formatta ótkizýge shaqyrdy.
Almaty ákimdigi qajetti qural-jabdyqpen (qolǵap, tyrma, kúrek, qap), kóshetpen qamtamasyz etip, aksıaǵa qatysýshylarǵa as-sý berdi. Merekelik kóńil-kúı jasaý úshin barlyq aýmaqta jattyǵý, ıoga, zýmba, sheberlik dáristeri, fleshmob uıymdastyryp, baıqaý ótkizip, júldeler berildi.
Ekobelsendiler Túrksib, Jetisý jáne Medeý aýdanynynda negizgi tórt oryndy belgiledi. Qoǵam belsendileriniń bastamasyna aýdandyń ákimdikter de atsalysyp, ózderiniń aýmaǵynda komýnaldyq qyzmetpen birlesip, jergilikti jerde senbilik ótkizdi. Aksıa barysynda qalanyń barlyq aýdanynda 26 aýmaq tazartyldy